Dizionari de Lenghe Furlane

sant  sant  [FO]

1. adi. che al ven venerât, che al merete venerazion religjose:  visitâ i lûcs sants; voaltris o savês: la glesie e varès di jessi sante. E à dut par jessi sante. Ma e je fate di oms e e je come che e je (Francesc Placerean, L'unic concuardât che la glesie no po rinunziâ al è chel cu la sô int)
   Sin. sacrât , sacri¹
   Var. sent¹
   
   1. che al à ce viodi cuntune divinitât, cuntune persone o entitât venerade, cu la religjon:  i sants vues di chest beadissim apuestul a son stâts traspuartâts in Spagne e sepulîts tai siei ultins confins (Antoni Beline, Sant Jacum, là che al finìs il mont)
   2. (iperb.) che al ven cjalât o presentât cun venerazion, ancje se al è profan:  chest Bisol, pensôs ancje lui, se Diu vûl, dal destin de Patrie grande e de sante Unitât, al declare che la cuistion des autonomiis e je malmadure (Josef Marchet, Un element fondamentâl dal moviment autonomistic)
2. adi., s.m. che, cui che al è venerât de Glesie, tant che persone benedide in particolâr de gracie di Diu, che i à concedût di jessi un esempli par ducj i cristians e di fâ miracui, ancje maiusc. devant di non propri:  a rumiavin Gloriapatris, a tiravin jù ducj i sants dal paradîs (Josef Marchet, Lis predicjis dal muini); se o ves di domandâ une gracie a Sant Jacum, santul dai pelegrins, o domandarès la preparazion e la moderazion (Antoni Beline, Sant Jacum, là che al finìs il mont); cuant che il Signôr insiemi cun sant Pieri al leve pal mont, une matine in sul cricâ dal dì a passavin su di un puint (Catarine Percude, Il voli di chest mont)
   
   1. rapresentazion artistiche o devozionâl di une di chês personis:  la stanzie e jere plene di sants e di madonis cul lumin impiât (Alan Brusini, Come tai romançs); la stale si benedivile une volte ad an, come la cjase; e su la puarte, par dentri, o suntune colone, nol mancjave mai un sant Antoni tune rame di ulîf (Riedo Pup, I furlans e la stale)
   2. soredut maiusc., devant di non propri, al forme locuzions che a indichin une glesie, un borc, un paîs e v.i. dedicât a chê persone:  une schirie di culinis cuintri dal cîl viert e piche sù cjampanii e cjistiei: Sante Margarite, Morùs, Feagne, Sant Denêl… (Dino Virgili, Friûl di Siarade)
   3. ancje maiusc., devant di non propri, par segnâ une dì dedicade a chê persone:  di Istât, massime tor Sant Ermacore, par parâsi dal scjafoiaç dal dopodimisdì, no mancjavin di lâ a nadâ te sfondare di Montagnôl (Lucio Perès, Tal Cuar); Macôr al spietave aromai il cumiât de colonie, ma al passà Sant Martin e nissun si fasè indenant (Riedo Pup, Il compromesso); Dree di Passût, muredôr, dopo dîs mês di lavôr in Svuizare, al torne a cjase sot sante Luzie e al smonte in stazion a Tarcint (Meni Ucel, Gjarmaneots)
   4. zornade dal onomastic:  «Bêf, Pieri, vuê che al è il to sant.» (Pieri Menis, La gjaline robade)
      Sin. onomastic , non¹
3. s.m. tal pl., cun iniz. maiusc., zornade e celebrazion di ducj i sants, il prin di Novembar, ancje in riferiment ae gnot prime, cuant che si crôt che lis animis dai muarts a fasin procession e a tornin a viodi des lôr cjasis:  talpinâ il bosc par cjapâ sù cjastinis lusintis su la stagjon che e mene dongje i Sants (Maria Forte, Il vivi al è chel rangjâsi); in chê volte chei tancj che a lavin vie pes Gjermaniis a sudorâsi il pagnut […]. A tornavin sot Sants e a sparivin tor Pasche (Meni Ucel, La "Fieste dai Roncs")
   Sin. dì dai Sants
4. adi. (enf.) par dâ plui fuarce a espressions, par segnâ completece, bondance, esagjerazion e v.i.:  al sfladassave dute la sante setemane batint sore dal mai il fier ruvielât e gjavant fûr cun mistîr ogni sorte di imprest (Josef Cjargnel, Lis aganis)

Polirematichis e espressions idiomatichis

• aghe sante loc.s.f.
• arc di sant Marc loc.s.m.
• circul di sant Marc loc.s.m.
• cul cjaval di sant Francesc loc.av.
• di vueli sant loc.adi.inv., loc.av.
• dute la sante mari dal dì loc.av., loc.s.f.
• fâ sant Martin loc.v.
• joibe sante loc.s.f.
• lunis sant loc.s.m.
• mâl di sant Valantin loc.s.m.
• no jessi ni sants ni madonis loc.v.
• no jessi sants loc.v.
• no jessi sants che a tegnin loc.v.
• puint di sant Marc loc.s.m.
• sant scugnî loc.s.m.
• sante scugne loc.s.f.
• vueli sant loc.s.m.

Proverbis:

• a Nadâl un pît di gjal, prin dal an un pît di cjan, a Sant Antoni un pît di demoni
• a Sant Barnabà il falcet tal pra
• a Sant Barnabà la ue e ven e e va
• a Sant Benedet la cisile e passe sot il tet, passe no passe, il frêt nus lasse
• a Sant Blâs al gote il nâs
• a Sant Blâs il frêt al taie il nâs
• a Sant Blâs ogni gjaline l'ûf e fâs
• a Sant Laurinç la cocule e scree il dint: screâ o no screâ, e je ore di sgjaruiâ
• a Sant Martin al vûl il forment tal cjamp o tal mulin
• a Sant Martin ogni most al è vin
• a Sant Micêl il marangon al impie il pavêr, a Sant Josef lu distude
• a Sant Michêl la cjastine tal fossêl
• a Sant Nicolò il frêt al dîs: o soi ca cumò
• a Sant Pieri il sorc al plate il puieri
• a Sant Pieri la blave e plate il puieri
• a Sant Ramacul la blave a va in penacul
• a Sant Simon si gjave il râf e il raviçon
• a Sant Simon si tire sù la cjalce e il scufon
• a Sant Simon, cui che al à i bregons di tele al è un mincjon
• a Sant Tomâs e je la zornade plui curte
• a Sant Valantin il vacjâr al distude il lumin
• a Sant Valantin si semene il plantin
• a Sant Zuan al jentre il most te ue
• a Sante Catarine il frêt al 'simine
• a Sante Catarine il frêt al va in cusine
• a Sante Crôs pan e coculis
• a Sante Crôs pan e nolis
• al ven ben sant paiarìn che nol rispiete nissun
• cuant che Diu nol vûl, i sants no puedin
• cui al è par indorâ sants, cui par fâ sacodâi di mus
• cui che al ame il Signôr al ame ancje i sants
• cui che nol crôt ai sants al crôt ai miracui
• di nissune albe no mi curi baste che chê di Sant Pauli no si scuri
• di rive jù ducj i sants a judin
• di Sant Tomâs a Nadâl al cres il dì un pas di gjal
• ducj i sants a son sants ma sant Filip e Facum, uhiu
• ducj i sants no fasin miracui
• fate la gracie si à in cûl il sant
• grant sant che al è sant jude, pecjât che in chest mont si lasse viodi di râr
• i sants lu scomencin e Sant Andree lu finìs
• il flôr tal cjamp, lu jude ogni sant; l'om tal mont, Diu lu jude ogni tant
• il prin dì di Inseri al è sant Pas, il secont sant Crepìn, il tierç sant Sclop
• il sorc tal cjamp bisugne che lu judi ogni sant
• il sorturc a Sant Zuan a la panze dal cjan, a Sant Pieri a la panze dal puieri
• il timp che al cor a Sant Suan al cor dut l'an
• in trê dîs la nêf e va vie: Sant Zuan, Sant Pieri e Sant Jacum
• injù ogni sant jude; insù nissun no si impace
• l'arc di Sant Marc la sere, bon timp si spere, l'arc di Sant Marc la doman, no ven mai sere che nol sedi pantan
• la Istadele di Sant Martin daspò trê dîs e po vê fin
• no bisugne mai infidâsi dai sants che a cjiin
• no si po cjantâ e puartâ il sant
• no stâ fidâti di chei che a tirin jù i sants in glesie
• no stâ fidâti di cui che al è sant in glesie e diaul in cjase
• no stâ fidâti tai sants che a cjiin
• nol è ce fidâsi di cui che al è sant in glesie e diaul in cjase
• ocjis, cjastinis e vin a son plats di Sant Martin
• ogni sant il so lumin
• ogni sant il so miracul
• ogni sant la sô cjandele
• ogni sant, piçul e grant
• par ogni sant i vûl la sô cjandele
• San Vicenç, grant criùre; Sant Laurinç, grant cjaldure: la une e la altre pôc e dure
• Sant Andree, il pes al va in sfree
• Sant Andree, il purcit su la bree
• Sant Andree, la trute a va in sfree
• Sant Antoni di Zenâr une ore bielavuâl
• Sant Antoni, il frêt al va di coni
• Sant Antoni, il frêt al va in demoni
• Sant Antoni, la ocje dal bonparon e tache a pogni, a Sant Valantin chê dal puarin
• Sant Bartolomiu la cisile a va cun Diu
• Sant Bastian cu la viole in man
• Sant Benedet un par sorte, doi par jet
• Sant Blâs e sante blasiole che a preservin il cuel cun dute la gole
• Sant Blâs il frêt al fâs la pâs
• Sant Blâs ogni gjalinate e fâs
• Sant Blâs se al cjate glace le disfâs, se no 'nt cjate ind fâs
• Sant Florean cul spi in man
• Sant Florean nol vûl ingjan
• Sant Gregori pape la cisile a passe la aghe, passâ o no passâ e je ore di arâ
• sant in glesie, diaul in cjase
• Sant Jacum e Filip, il puar al coione il ric
• Sant Josef al plante la cuche, Sant michêl le gjave dute
• Sant Laurinç, pulçs di puartâ vie cul buinç
• Sant Luche al puarte vie la mirindute
• Sant Martin al fâs il so fin
• Sant Martin il most al devente vin
• Sant Matie cu la manariute se al cjate glace le fruce dute
• Sant Matie se al cjate glace le pare vie, se no 'nt cjate ind fâs vignî
• Sant Matie, la vuite si invie
• Sant Michêl che al dîs il vêr, se nol è culì, al è culì
• Sant Pauli lusint, tante paie e tant formint
• Sant Pauli scûr, dal Invier no sin fûr
• Sant Pauli scûr, forment sigûr
• Sant Pieri al faseve la barbe prin par se
• Sant Pieri, la blave e plate il puieri
• Sant Roc i da la clâf a ogni pitoc
• Sant Scugnî al è ancje murî
• Sant Scugnî al è un brut sant
• Sant Scugnî al è un grant sant
• Sant Scugnî al fâs lâ di rive sù
• Sant Simon e jude la rave a ven madure, madure o no madure, si le met sot sieradure
• Sant Simon i da la clâf al so paron
• Sant Simon, e va la lodule tes rêts a tombolon
• Sant Simon, manie e scufon
• Sant Valantin al fâs il malefin
• Sant Valantin al glace il curisin
• Sant Valantin al inglace la roie cun dut il mulin
• sant Vît cjataitmi il marît, Sant Modest cjataitmal di sest, Sante Cressence no stait a lassâmi cence
• Sant Zorç si bute la cjalce fûr pe cort
• Sant Zuan al fâs viodi l'ingjan
• Sant Zuan nol imbroie une code di cjan
• Sant Zuan nol mangje corean
• Sant Zuan nol mangje peçots
• Sante Agnese, mieç fen e mieze spese
• Sante Barbare benedete vuardaitnus dal ton e de saete
• Sante Barbare e Sant Simon vuardaitnus dal lamp e dal ton
• Sante Catarine cent gjambars par tanine
• Sante Catarine e mene il frêt cu la caretine
• Sante Catarine la nêf a la culine, Sant Bastian la nêf al mont e al plan
• Sante Catarine o sîs o siet co vigne, spietimi a Sant Tomât che o vignarai cul cjar cjamât
• Sante Luzie il frêt al cuzie
• Sante Luzie il frêt si invie
• Sante Redegonde la sape sot de gronde
• scherce cui fants e lasse stâ i sants
• scherce cui fants ma lasse in pâs i sants
• scomence che po ogni sant al jude
• se a 'nt fos, se a 'nd ves, se a 'nt sarès a son trê sants che no fasi miracui
• se a 'nt fos, se a 'nd ves, se a 'nt sarès a son trê sants che no judin
• se a 'nt fos, se a 'nt sarès e se a 'nd jere, a son trê sants che no judin
• se a 'nt fossin, se a 'nd vignissin, se a 'nd vessin, a son trê sants che a durin dut l'an
• se a Sant Bartolomiu al è bon timp, al è bon timp dute la vendeme
• se a Sant Bartolomiu al jeve il soreli clâr, o vin zulugne prin dai Sants
• se al è bon timp a Sant Zorzon, siet bogns timps e un bon timpon
• se al è bon timp il dì di Sant Zorzon, la vendeme a va benon
• se al plûf a Sant Zorzon, siet montanis e un montanon
• se al plûf a Ssant Laurinç, la campagne le vinç
• se al plûf il dì di Sant Barnabè, e cole la ue fin che a' nd è
• se al plûf il dì di Sant Zorç, il cavalîr al va te cort
• se al plûf il dì di Sant Zorzon, la vendeme a va malon
• se al svinte a Sant Grivôr, lu vin cuarante dîs a fâ rumôr
• se al svinte a Sant Valantin, cuarante dîs nol à fin
• se al tone il dì di Sant Zorç, dutis lis coculis a van te cort
• se Diu al vûl, bisugne rispietâ la sô sante man
• se Sant Pieri nol vierç la puarte, no si po lâ in paradîs
• tiere sante e aghe sante a fasin pantan
• vuê al è Sant Benedet se nol pie di vert al pie di sec