Dizionari de Lenghe Furlane

non¹  /-ò-/  non  [FO]

1. s.m. peraule che e à une flession daûr di gjenar e numar, e tes lenghis che a 'nd àn, câs, in contraposizion cun verps, che a àn la coniugazion, e altris parts dal discors:  sostantîf e adietîf a son nons
   
   1. (par anton.) viôt sostantîf :  il talian in pratiche nol à morfologjie pe declinazion (formalmentri al ten par so cont par nons e adietîfs dome il numar e il gjenar) (Vladimír Petkevič, trad. di Zorç Cadorin, Corpus linguistics)
2. s.m. peraule che e significhe, cence identificâle in maniere individuâl, une persone, une robe, un coletîf di personis o robis, un concet e v.i.:  e clamave ogni robe cul so non precîs (Carlo Sgorlon, Ombris tal infinît); "Cjalcjut" "Vencul" "Pesarin" "Pesarûl" "Sbilf" "Fracule" son diviers nons che a vuelin dî ducj l'istès, spirts di personis che a àn un podê speciâl e che a van fûr dal lôr cuarp par fâ dal mâl (Sandri Carrozzo, Friûl di Magance)
   Sin. tiermin , peraule , vocabul
3. s.m. peraule identificative, ancje cun valôr di uficialitât, dal individui o de sô famee o di un singul ogjet, element gjeografic, organizazion, concet e v.i.:  nuie da dî che il non di Vera al sedi un biel non, ma la int le clame e le clamarà in vite "la Russe" (Ivano Urli, Storie di Vera); al stave spiegant e contant nons di autôrs, datis e curiositâts (Zuan Lurinçon, La Madalene); pes ramadis largjis dal cafè al lampave il semafar zâl e si viodeve i cartei di une crosere di stradis, cun nons todescs, iluminâts di lûs blancje (Agnul di Spere, L'avignî di Antoni Cossâr)
4. s.m. il jessi cognossûts e il gjoldi di plui o mancul rispiet:  i svuizars a saressin rivâts istès a limitâ il numar dai lavoradôrs forescj, ma cence masse scandui. No in maniere traumatiche pal non de Svuizare tal mont (Agnul di Spere, In viaç di domenie)
   Sin. nomee , nomenance , nomine , reputazion , onôr , onorabilitât , muse¹ , bon non
5. s.m. persone plui o mancul cognossude:  [vincint il premi Viareggio Repaci] Cappello al devente di fat un dai plui impuartants nons de leterature taliane (Walter Tomada, Pierluigi Cappello: «L’om plui concret? Il poete»)
   Sin. personaç , figure
6. s.m. zornade dedicade a un sant, che e pues jessi celebrade di ducj chei che si clamin come chel sant:  "E ce âstu di fâ des violis?" "O ai di regalâlis ae mê morose: vuê l'è il so non!" (Vittorio Vittorello, A ogni cost)
   Sin. onomastic , sant

Polirematichis e espressions idiomatichis

• a non di loc.prep.
• bon non loc.s.m.
• cence non loc.adi.inv., loc.s.m.
• clamâ lis robis cul lôr non loc.v.
• dâ il non loc.v.
• dâ non loc.v.
• dâ un non loc.v.
• fâ nons loc.v.
• in non di loc.prep.
• intal non di loc.prep.
• no fâ nons loc.v.
• tal non di loc.prep.
• vê il non loc.v.
• vê il non cun se loc.v.
• vê non loc.v.

Proverbis:

• ce che si po fâ vuê, no metii non doman
• il bon non al ingrasse i vues
• lari e avocat al è un non sôl
• mancul robe e plui non
• se o ves un fi che al ves non doman, o volarès maçâlu daurman