Dizionari de Lenghe Furlane

peraule  /-à-/  pe|rau|le  [FO]

1. s.f. singule unitât intes frasis de lenghe scrite o fevelade, che si pues distingui di chês altris stant che e à un significât e une funzion:  Minut, inglotint la salive e sbassant il cjâf, al leiè […] e ogni peraule de cjarte e di Minut si incjarnave tun moviment de muse di Cuesim (Dino Virgili, La aghe da pît la cleve); par meti in vore lis primis fasis dal progjet si à destinât di rivâ a etichetâ un corpus di prove di 100.000 peraulis (Sandri Carrozzo, Franz Feregot, La elaborazion di un corpus etichetât de lenghe furlane scrite: esperiments e prospetivis)
   Var. paraule
   
   1. singule unitât di une lenghe, cuntun so significât specific, che al pues presentâsi in diviersis formis daûr de flession, de coniugazion e v.i.:  [la normalizazion dal lessic] e implicave ancje i criteris di formazion des peraulis gnovis e la adozion dai imprestits (Adrian Cescje, Memoriis di politiche linguistiche); par dì il «fradi dal pari o de mari» in Portugal e in Spagne a si dopre la peraule tio (come tal talian zio), in France oncle (che dopo al è jentrât ancje tal todesc Onkel e tal inglês unckle), in Romanie unchiu, che ducj a vegnin dal latin avunculum (Giovanni Frau, Peraulis in libertât: i atlants linguistics)
      Sin. tiermin , vôs , vocabul , leme
2. s.f. discors, fevelade, spec. cun ciertis carateristichis o cun cierts intindiments, specificâts o che si capissin dal contest:  mai une barufe o une peraule stuarte, un matrimoni fortunât (Alan Brusini, Come tai romançs); simpri tal mieç di ducj, poiât al so baston, e simpri une peraule par ducj (Maria Forte, Cjase di Dalban); Matia, Matia, al à rason. Diseit vû na peraula! Diseitghi che i Turcs a no stan ducju insiemit, ma che a si dividaran in tancju scjaps […] (Pier Paolo Pasolini, I Turcs tal Friûl)
   Sin. dit
   
   1. espression, comunicazion di un sintiment, di un mût di stâ e v.i.:  ce vite che si mene, no une ore di ligrie, no une peraule di bontât, di afiet (Pieri Somede dai Marcs, Gnot di Nadâl)
   2. espression di une opinion, di une critiche, osservazion:  deventât ombrôs, oltran, salvadi, i bastave une peraule par mandâlu in bestie (Alan Brusini, Come tai romançs); a vevin di imparâ a tasê une buine volte, di lassâlu fâ a so mût e no une peraule pai siei strabalçs in ostarie (Maria Forte, La tiere di Lansing)
   3. racomandazion:  sô mari i predicjave saldo al om di cjatâi un lavôr provisori a di chel frut […]. A Udin, par esempli, là de sartorie di siore Madalene. Jê e po dî une peraule par che lu tegnin (Alan Brusini, Par stradis lungjis)
      Sin. buine peraule
3. s.f. spec. tal pl., ce che si dîs, al contrari di ce che si fâs:  [il guvier] al varès di fâ mancul sunsûr e plui lavôr (mancul peraulis e plui fats) (Josef Marchet, La scrassigne)
   Sin. cjacare
   
   1. ancje in espressions enfatichis, par rimarcâ il contrast tra ce che si dîs e ce che al è la realtât o ce che al è pussibil:  un telegram dal prefet che al da la notizie uficiâl, al ordene di meti fûr lis bandieris e di «celebrare subito l'avvenimento». Une peraule! … Ma ce si vevial di fâ intun paîs e cun chê nêf? (Pieri Somede dai Marcs, 11 di Fevrâr 1929)
4. s.f. ce che si dîs par insegnâ, conseâ e v.i.:  tu puedis dâur un messaç, une peraule, un piçul insegnament che a tignaran a ments (Cristina Noacco, Faliscjis); [sant Zuan] lu àn metût in preson, i àn taiât il cjâf, ma la sô peraule e je restade (Catarine Percude, La rosade di sant Zuan)
   Sin. inscuelament , insegnament , consei
5. s.f. facoltât di fevelâ:  vigniva fûr spissulant un fîl di aga che al colava sui claps e pareva che al fevelàs; ma propria, savêso, come che al ves vût la peraula (Ugo Pellis, Catinuta)
   Sin. fevele , vôs
   
   1. emission di suns par fevelâ:  i tremave la peraule (Dino Virgili, La aghe da pît la cleve); e cirive di vierzi bocje par rispuindi, ma la peraule no i vignive (Roberto Ongaro, Il muc)
      Sin. vôs
   2. mût, capacitât di esprimisi:  nol jere pardabon ce che si dîs un di chei umigns che ur fasin cori il sanc a lis fantatis. Bocon, chest sì, e ancje svelt di peraule, ma pluitost sbaiafon (Gianni Gregoricchio, Trê feminis); al stave spiegant e contant nons di autôrs, datis e curiositâts cun chê sô peraule facile, clare e precise (Zuan Lurinçon, La Madalene)
      Sin. fevele
6. s.f. espression di ce che si pense:  libertât di peraule, di pinsîr e di stampe (Angelo Floramo, Cuintristorie dal Nûfcent 1940-1950)
   
   1. pussibilitât o turni di dî ce che si pense:  di regule, nissun conseîr nol podarà vê la peraule sul stes argoment plui di dôs voltis (Aministrazion Publiche, Regolament dal Consei Comunâl dal Comun di Udin)
   2. (fig.) pussibilitât di fâ valê la autoritât, il podê, il dirit:  jo us lassi par cumò, e a pene fûr di ca al à la peraule il professôr che us spiegarà dut cuant (Costantino Smaniotto, Co l'amôr al cimie); e je ore che ancje i piçui, i puars, chei che a àn butât sanc e patît simpri - e simpri tasût -, a vebin di pesâ cu la lôr peraule e fâsi avalê de lôr idee! (Dino Virgili, La aghe da pît la cleve)
7. s.f. informazion, ancje a pene motivade, aprossimative, no complete:  e veve un ciert mût di cjalâmi come par motivâ: «Bocje tâs!… No une peraule su chel che ti ai contât. Che al resti un segret jenfri di nô.» (Carlo Sgorlon, Il dolfin)
8. s.f. il dî che si fasarà alc, che si rispietarà un pat e v.i.:  i trê delegâts che a jerin lâts a fevelâ cun lui i vevin dade la peraule che no varessin fatis dimostrazions di proteste (Adrian Cescje, Memoriis di politiche linguistiche); e infin farai del dut, ti doi peraule, / che tu seis ben tratât e ben servût (Pieri Çorut, A Tite Bas)
   Sin. promesse , impegn

Polirematichis e espressions idiomatichis

• bagnâ la peraule loc.v.
• baratâ la peraule loc.v.
• buine peraule loc.s.f.
• butâ une peraule loc.v.
• cjoli la peraule di bocje loc.v.
• dâ la peraule loc.v.
• di une peraule sole loc.adi.
• fâ gloti la peraule loc.v.
• fâ gloti peraulis e lenghe loc.v.
• fâ peraule loc.v.
• gjavâ la peraule di bocje loc.v.
• male peraule loc.s.f.
• meti cuatri peraulis in file loc.v.
• meti cuatri peraulis in rie loc.v.
• meti trê peraulis in rie loc.v.
• meti une buine peraule loc.v.
• meti une peraule loc.v.
• misurâ lis peraulis loc.v.
• partî peraule loc.v.
• passâ la peraule loc.v.
• passâ peraule loc.v.
• restâ cence peraulis loc.v.
• sbrissâ la peraule loc.
• vê une peraule sole loc.v.

Proverbis:

• "se" e "ma" e "cuissà", a son trê peraulis di ponderâ
• a bon intindidôr, pocjis peraulis i bastin
• a valin plui i fats che no lis peraulis
• ancjemò su lis peraulis no son dazis ni tassis
• bielis peraulis e cjatîfs fats a incjanin savis e mats
• cu lis bielis peraulis e i bruts fats si ingjane savis e mats
• cu lis bielis peraulis no si jemple la panze
• cuntune peraule si po ofindi
• dulà che al sta un pan e sta ancje une peraule
• dulà che e sta une bocjade di pan e po stâ ancje une peraule
• dutis lis letaris no van a la pueste, dutis lis peraulis no mertin rispueste
• i umign si cjapiju pe peraule, i bûs pai cuars
• la miôr e la piês robe e je la peraule
• la peraule che e scjampe e sa indulà che e va
• la peraule e fâs l'om
• la peraule e je chê che e vâl
• la peraule e svole, la cjarte e reste
• lis feminis si leilis pe peraule, lis vacjis pe cjadene
• lis peraulis a son des feminis, i fats a son dai umign
• lis peraulis a son feminis, i fats a son umign
• mancul peraulis e plui fats
• mieze la robe e sta te peraule
• miôr tasê che no vê la peraule vueide
• no si pense mai a dutis lis peraulis che si dîs
• ogni peraule no merte rispueste
• peraulis e blestemis no fasin pôre
• prin di dî une peraule, bisugne bati la ale tant che il gjal
• une peraule ben dite e juste une malegracie mâl fate
• une peraule des voltis e coste cjare
• une peraule e tire chê altre