vôs
vôs
[FO]
-
s.f.
emission di suns fate des personis par fevelâ, cjantâ, clamâ e v.i.:
la Penze e saludave a man e vôs, stant su la puarte (Dino Virgili, La aghe da pît la cleve);
cuant che il cjan al fermave di vuacâ al sintive lis vôs e i sunsûrs de cene dentri cjase (Carlo Sgorlon, Prime di sere)
-
[TS]
fon.
fonazion, produzion di suns armonics modulabii, lis vocâls e v.i., e rumôrs, lis consonantis e v.i., fate plui che altri cu la emission dal aiar dai polmons, traviers de glotide e des cavitâts oronasâls:
la intensitât de vôs, associade a la emission de silabe e jere plui grande cuant che i partecipants a cjapavin sù i ogjets plui larcs (Giacomo Rizzolatti, Laila Craighero, Speculazions su la origjin dal lengaç)
-
maniere di emeti i suns par fevelâ, cjantâ e v.i. tipiche di une persone:
la vôs di Greg Lake ti tire dentri e ti traspuarte intun insium… dal rest… no jerial lui stes a cjantâ tai prins magjics King Crimson? (Checo Tam, Ladies and gentlemen… Emerson, Lake & Palmer!);
"Gnagne, gnagne Anute… vierzimi… no mi cognossistu te vôs!" (Pieri Menis, Sul agâr)
-
s.f.
timbri o caratar di chê emission di suns:
si sintive a cjaminâ int, a lâ e tornâ, po ancjemò a vaî une vosute cree, ma vive vive (Pieri Menis, Chei di Muraie);
une vôs grocjose e zigà, a dute gnot, di colp, a fuart, che e parè li difûr, tal curtîl (Dino Virgili, La aghe da pît la cleve);
"Ti cognòs, ti cognòs" al sgrasaiave cu la vôs grocje (Maria Forte, Il Bulo di Crodio);
il vieli si jere dreçât su lis spadulis e al fevelave cu la vôs sclendare "Tavin… no stâ fevelâ cussì di Tavin!" (Dino Virgili, La aghe da pît la cleve);
i berlà lis domandis muse cuintri muse, cun vôs di orcul (Gianni Gregoricchio, Trê feminis);
la Morane e jere une femenone ruane, ma no beveve, cuntune vosate di om (Pieri Menis, Chei di Muraie)
-
fuarce vocâl:
al zigà a fuart, cun dute la vôs e il dolôr che i sclopavin dal cûr (Dino Virgili, La aghe da pît la cleve);
"Papà, alce la vôs che no ti sint! " (Alan Brusini, Amîs come prime)
-
pussibilitât di fevelâ, tant a nivel fisiologjic che psicologjic:
si è metude a cori, e e à corût fin a Udin, cence flât e cence vôs (Pieri Menis, Lis leiendis di Buie);
ê, puare femine, si vergognave di murî […] no i vignive nancje la vôs par parâsi, par rispuindi (Roberto Ongaro, Il muc)
-
spec. tal pl., alucinazion acustiche:
al jere rivât dongje il ciprès dal porton di cjase. Ancjemò une volte i someà di sintî la vôs di so nono. E jere une vôs buine, di fede e di rassegnazion (Pieri Menis, Sul agâr);
ogni tant al sintive "vôs", e al pensave che no fossin sôs ma dai dius che i fevelavin e che i comandavin (Franc Fari, Il cjâf dai furlans)
-
s.f.
viers di un animâl:
e rivave la vôs dai rusignûi che a si clamavin tes boschetis dulintor (Alan Brusini, Come tai romançs);
e vignive jù dal bosc une vôs di uciel…, nete, come di risultive (Maria Forte, La tiere di Lansing)
Sin. viers
-
s.f.
sunôr di un strument musicâl:
la cjampane di Toresele e veve une vosute lizerine, e chê di Dargnà i lave daûr cun chê vôs tonde (Dino Virgili, La aghe da pît la cleve)
-
s.f.
sunsûr, businament produsût di alc, di cualchi fenomen naturâl:
cumò chê vôs dal flum cun chel mugulâ o cisicâ come un che al feveli di sotvôs… e fâs pôre, cumò, a sintîle chê vôs (Dino Virgili, La aghe da pît la cleve);
a fâti scjassâ e sdrondenâ cussì a bastarès nome il businâ feroç de aghe, nome la vôs dal Tiliment (Stiefin Morat, Donald dal Tiliment)
-
s.f.
sunôr di trasmissions radiofonichis, televisivis, in proiezions cinematografichis:
i pareve di cjatâsi dentri di un film cence vôs… al continuave a no sintî nuie (Checo Tam, Fantasimis a Sant Martin)
Sin. sun1
, sunôr
, volum ipon.
, audio
-
persone che e fevele in radio, soredut di profession o cun regolaritât:
Sergio Visentin, par tancj agns vôs legre de buinore radiofoniche (Max Mauro, Un Friûl difarent: i 90 mhz di Onde Furlane)
-
s.f.
(fig.)
ce che al ven dite di cdn. par proteste, par clamâ, visâ, dâ une opinion o un consei e v.i.:
mi spieti che te conference ducj a scoltedin la vôs autonomiste che e domande la tutele identitarie (Adrian Cescje, Memoriis di politiche linguistiche);
[la Assemblee de Comunitât Linguistiche Furlane] e à vût vôs in cuistions di tutele dai dirits linguistics (Sandri Carrozzo, La politiche pe lenghe furlane: risultâts de ultime aministrazion regjonâl in Friûl-VJ e propuestis pal avignî)
-
s.f.
(fig.)
ce che al puarte messaçs, ideis, ricuarts e v.i.:
chel grum di robis vieris, a son la vôs di so pari (Alan Brusini, Par stradis lungjis);
l'unic gjornalisim radiotelevisîf che al rivave a sei vôs dal Friûl, vôs autonomiste, vôs moderne e zovine […] al jere chel di Radio Onde Furlane (Adrian Cescje, Memoriis di politiche linguistiche)
-
s.f.
(fig.)
sburt interiôr che al puarte a fâ, pensâ o decidi alc:
e scugnive scoltâ chê vôs di afiet che i stave tal sanc. Scoltâ l'amôr pai fîs che a vuelin la mari simpri sante e mai femine che e svarii tes passions (Maria Forte, Cjase di Dalban);
«Tu scugnis» mi diseve une vôs dentri di me, flevare ma clare, plene di autoritât (Carlo Sgorlon, Il dolfin)
-
s.f.
(fig.)
esponent di un ciert cjamp:
la ocasion e je stade la taule taronde a plui vôs sui temis de educazion plurilengâl (Erika Adami, «Regjon, promôf lis lenghis!»);
Tal 1942, an che al segnave i 150 agns de nassite di Pieri Çorut, dôs vôs in particolâr a mostrin di no volê cjapâ part aes celebrazions gjenerâls. A son chês di Pier Paolo Pasolini e Josef Marchet (Cristina Cescutti, Leterature furlane)
-
s.f.
(fig.)
notizie che no si sa di dulà che e ven, e duncje no sigure o ancje che e je false dal sigûr ma che e zire istès:
al jere destin che i ultins agns di Cavedalis a fossin caraterizâts di marums, par vie di ciertis vôs che si jerin jevadis cuintri di lui (Giovanni Pillinini, Zuan Batiste Cavedalis - Une vite esemplâr);
si sintivin a zirâ brutis vôs, ma i triscj a son tancj e ai gjornâi che a disin ben o che a disin mâl nol è nuie ce crodi (Pieri Somede dai Marcs, Sant Simon: 28 di Otubar 1917)
Sin. cjacare
, cjampane
, gnove
, peteç
, tabaieç
, voghe
-
s.f.
peraule, vocabul:
intun Grant Dizionari Bilengâl Talian Furlan di passe 60 mil vôs patrimoniâls e neologjichis (Adrian Cescje, Tal non di Fausto Schiavi);
il manuscrit segnât Raetorom.Fol.14 (str BÖHMER 1885, p. 202) al puarte dôs vôs (cun cetantis sotvôs) di une cercje di dizionari furlan (Zorç Cadorin, Doi autografs di Toni Broili framieç dai manuscrits furlans di Berlin conservâts a Cracovie)
Sin. peraule
, tiermin
, vocabul
, leme
, jentrade
-
s.f.
[TS]
reson., econ., stat., cum.
ognidun dai elements, indotâts di une denominazion, che a son intune liste organiche, intun complès di dâts:
la Zonte e à tornât a meti i fonts su cheste vôs cu lis variazions di belanç dal 2011, ma ridusûts di un cuart rispiet a ce che si veve prime (Carli Pup, Sot atac l'avignî de lenghe furlane);
tal moment di aprovâ la partizion economiche su lis vôs di spese inte sentade dal Consei di aministrazion dai 11 di Novembar dal 2008, al disè che lui si sarès astignût (Adrian Cescje, Memoriis di politiche linguistiche)
-
s.f.
[TS]
mus.
ognidune des parts melodichis che a formin une composizion polifoniche:
lis vendemis sui roncs cjantant vilotis a dôs vôs (Alan Brusini, Come tai romançs);
la gnot de sabide di Pentecostis a lavin in procession lustrant la vile, cjantant a dôs vôs une cjançon che e tacave […] cu lis peraulis "schiarazzola marazzola […]" (Sandri Carrozzo, Benandants e Terapeutis / Terapeutidis)
-
cjant, part e esecuzion cjantade intun conciert:
us segnalìn la bielissime La cure in version unplugged dome ghitare e vôs (Natascia Gargano, La magjie in musiche di Aldo Rossi)
Polirematichis e espressions idiomatichis
Proverbis:
- ni di om che al à vôs di femine, ni di femine che e à vôs di om no si fide il galantom
- vôs di mus no rive in cîl
- vôs di mus no va in cîl
- vôs di mus no va in paradis
- vôs di popul, vôs di Diu
- vuarditi dal om che al à la vôs di femine
- vuarditi de femine che e à vôs di om