Dizionari de Lenghe Furlane

cjacare  /cjà-/  cja|ca|re  [FO]

1. s.f. massime tal pl., discors di pocje impuartance, fat par passâ il timp:  no mi va di misturâmi a cierte int parcè che lis lôr cjacaris no mi interessin pont e cussì mi cjati dispès a zirâ di bessôl (Checo Tam, Sense); mari sante, cetantis cjacaris che al mi à fatis! (Josef Marchet, Lis predicjis dal muini); une di chês zornadis plenis di fastidis e di cjacaris che a sglonfin cence cumbinâ nuie (Pieri Somede dai Marcs, Interès malandret); fasile curte, Orgnan! O soi stuf di scoltâti! La tô cjacare mi jemple dut chest univiers… (Checo Tam, Sense)
   Sin. babade , babeç , cjacareç , naine , peteç , cjacarade , tabaiade
   
   1. ce che si dîs, rispiet a ce che si pense o ce che si fâs:  al veve capît adore che lis cjacaris a son une robe e i fats une altre (Alan Brusini, Come tai romançs); un fregul di decentrament aministratîf tant par salvâ la muse dopo tantis promessis, tantis cjacaris e tant lavôr di sotcomissions, e baste (Josef Marchet, La gnespule malmadure)
      Sin. peraule
   2. ce che si dîs, che magari al è cence fonde o che no si tache cu la realtât:  al covente l'interès e la buine volontât di cualchi studiôs, cence di chescj si pues dome fâ sù cjistiei e cjacaris (Franc Fari, Il cjâf dai furlans)
   3. robe che si dîs par straviâ la atenzion di cdn.:  "Vonde punturis", al vosà Fonso. "O vuei bevi, vêso capît? Aghe, o vuei, e no cjacaris!" (Amedeo Giacomini, Tal ospedâl)
      Sin. scuse , peraule , sflocje , bale , monade¹
2. s.f. notizie no vere o no confermade che si dîs ator:  in paîs si sunsurave che al ves puartât incà un tesaur di aur; e intor di cheste cjacare a vevin ricamât une vore (Gianni Gregoricchio, Trê feminis); [te biele stagjon] lis primis sagris, int che si maridin, oms che a partissin pe Gjermanie. Forsit la ultime stagjon, pes cjacaris di vuere che si sintin (Alan Brusini, Par stradis lungjis)
   Sin. bale , bausie¹ , bufule , luianie , pantiane , peteç , pitintane , sflandogne , sflocje
3. s.f. robe che si dîs daûr di cdn., ancje cun malignitât:  lis cjacaris a disin che Clare e sarès cjapade di fuarte simpatie… che e sarès cuete… (Pieri Piçul, Vieri e gnûf); a meti fûr la cjacare e jere stade Nene Carete une vedrane lengone e triste (Pieri Menis, I siops); cuant che e salte fûr une cjacare sul plevan, ancje i plui catolics a disin suspirant che «di nuie nol ven nuie» e «se la int e cjacare, alc di vêr al scuen jessi» (Antoni Beline, Sant Jacum, là che al finìs il mont)
   Sin. babeç , chic , cic , cjampane , clamade , maldicence , mormorazion , passarat , peçot , peteçarie , slengaçade , slengament , soflet , sunôr , ves , vesse , voghe , vôs
4. s.f. facilitât di peraule, buine fevele:  al à une cjacare che al podarès fâ l'avocat
   Sin. batule , bardele

Polirematichis e espressions idiomatichis

• fâ cuatri cjacaris loc.v.
• fâ dôs cjacaris loc.v.
• pierdi timp in cjacaris loc.v.
• pierdisi in cjacaris loc.v.

Proverbis:

• a lis cjacaris des feminis no si abade
• a valin plui i fats che no lis cjacaris
• cjacare no pas gjat
• cjacaris no fasin lasagnis
• cjacaris no passin
• cu lis cjacaris no si conclût nuie
• cu lis cjacaris no si jemple i budiei
• cu lis cjacaris no si jemple la panze
• cu lis cjacaris no si paie debits
• fâs ce che tu âs di fâ e lis cjacaris de int no stâ abadâ
• feminis e passaris un grant scjalâr di cjacaris
• l'om si cognòs cui fats e no cu lis cjacaris
• l'om si scuvierç cui fats e no cu lis cjacaris
• la panze no si implene cu lis cjacaris
• lis cjacaris lungjis a fasin la gnot curte
• pocjis cjacaris e putrops fats
• tropons a son amîs a cjacaris e pôcs a fats