peçot
/-ò-/
pe|çot
[FO]
-
s.m.
toc di tiessût doprât soredut par netâ, ma ancje par cualsisei robe che e coventi:
i plaseve lâ ator in biciclete, la sô antighe Vander tipo sport che al tignive come un spieli, lustrade cul peçot (Alan Brusini, Par stradis lungjis);
[la camarele] e jere li, e passave il peçot sul banc (Alan Brusini, Gian Paolo Linda, I forescj)
Sin. canevaç
, piece
, peçote
, sbrendul
, strace
, straç
, sfreadôr
-
materiâl di tessût:
[par Sante Luzie] lis frutis a spietavin la pipine. E prin o dopo e rivave: une pipine di peçot; tant biele che mai (Riedo Pup, I furlans e Sante Luzie);
si fermavin lis feminis che a parevin plui piçulis di chel che a jerin sot dal cjapiel cjariât di rosis di peçot, cui grumalons plens di ricams a colôrs (Pieri Menis, Une altre biele gnove pal Friûl)
-
s.m.
robe di metisi intor, spec. puare o malmetude:
ancje vistude di peçots, Line e je une grant biele fantate (Roberto Ongaro, Cretevierte)
Sin. blec
, garbat
, grabatul
, sbrendul
, stripicin
-
s.m.
toc di tele che si pues lavâ, metûts ai frutins par che no sporcjin:
"[…] se ti vanze cualchi tocut di tele metile vie pal nestri frut." […] Jê e va, ma al rive il princip e al dîs: "Viodêt che no vebi robât alc; fasêt il visaperto." I cjatin i tocuts di tele par doi peçots (Andreina Nicoloso Ciceri, I trê cjadreons - Racconti popolari friulani I);
"I âstu metût il peçot a Tilio?" (Gianni Gregoricchio, Trê feminis)
Sin. panut
, panzit
-
s.m.
persone debile, butade jù:
[la frutate] e fo un peçot jê e la man che le veve pal stomi e no podeve distacâsi (Dino Virgili, Pôre tal nuie…)
Sin. sbrendul
-
robe ruvinade, vuastade:
[Vignesie] e veve comandât in Friûl par 376 agn e cualchi mês: in dut chel timp e jere rivade adore di ridusilu come un peçot sbridinât (Josef Marchet, Cuintristorie dal Friûl fin sot la Italie)
-
s.m.
spec. tal pl., cjacare triste fate daûr di chei altris:
cjacaris fra lôr e lis fameis. Peçots dome a nivel dai curtîi, va ben, ma cun dut achel a siôr Bertin i jere scomençât il batiment di cûr (Maria Forte, Cjase di Dalban);
culì la int e disledrose i peçots di ducj e o 'nd ai sintudis di chês… (Carlo Tolazzi, La salamandrie tal fûc)
-
fat che al gjenere cjacaris o rancûr gjenerât des cjacaris:
il mezât al è di colp deventât il cjadaldiaul… A son saltâts fûr ducj i peçots, dutis lis rognis, e iris di Diu: si jerin jevâts in pîts, si 'nd àn ditis di ogni colôr (Pieri Somede dai Marcs, Par la firme di un contrat)
Polirematichis e espressions idiomatichis
Proverbis:
- i peçots a van par aiar
- i peçots si ju lave in cjase
- il mês di brume ogni peçot si ingrume
- no bisugne lâ daûr dai peçots dai fruts
- no stâ lâ daûr di peçots di fruts
- no stâ tignîi daûr a ogni peçot
- prin rosis e flocs, po mierde e peçots
- Sant Michêl nol mangje peçots
- Sant Zuan nol mangje peçots