Dizionari de Lenghe Furlane

sun¹  sun  [FO]

1. s.m. vibrazion e sensazion acustiche produsude de vibrazion di un cuarp che si môf in maniere regolâr e svelte, che si difont tal aiar o in altris mieçs elastics:  a balavin tal tinel, daûr il sun dal piano (Dino Virgili, La aghe da pît la cleve); lis cjampanis a sunavin in dopli e il lôr sun al si spandeve cuntune grande ligrie su la campagne indorade dal soreli de matine (Pieri Somede dai Marcs, Nadâl); l'imprest [la scraçule] al veve un sun fuart, sec e regolâr (Carlo Sgorlon, Prime di sere); la casse e dave un sun çondar di robe vueide (Maria Forte, La cjase dal Murat); la conservazion de grafie etimologjiche q e significhe la esistence di dôs grafiis par un sun sôl (Xavier Lamuela, La grafie furlane normalizade)
   Sin. sunôr , sunsûr
2. s.m. musicalitât, armoniositât di peraulis o espressions e sensazion che a produsin:  lis peraulis a vevin un altri sun te cjase cidine, chê sere… (Dino Virgili, La massarie); mi ven tal cjâf il furlan di Glemone, mi vise il periodi dal taramot, […] o ai vîf chel ricuart e mi plâs il sun di chel furlan (Oscar Puntel, Toni Capuozzo: «Ognidun al bale cun sô agne»)
   Sin. musiche , ande , sunôr

Polirematichis e espressions idiomatichis

• a sun di loc.prep.
• a sun di dâi loc.av.

Proverbis:

• daûr il sun si bale
• il violìn che al fâs la danze si cognòs ce sun che al à
• tal sun si cognòs lis cjampanis