Dizionari de Lenghe Furlane

bielece  /-lè-/  bie|le|ce  [FO]

1. s.f. cualitât astrate dal fat di plasê par vie dal aspiet, de forme:  "La nature mi fevele cul lengaç de sô bielece e jo, traviers lis sôs robis, o rivi ae inteligjence de divine perfezion". A son peraulis sôs [di Sant Agostin] (Alan Brusini, Amîs come prime); la bielece, la poesie, il misteri des fiestis di Nadâl (Pieri Menis, Il pignarûl); la claretât de aghe mi riclame la bielece origjinarie de creazion (Antoni Beline, Sant Jacum, là che al finìs il mont)
2. s.f. aspiet, forme che e plâs, che e à valôr estetic:  mi veve inmatît chê sô bielece mole, plene di lancûr (Alan Brusini, Gian Paolo Linda, I forescj); al jere impussibil spietâsi une creature plui interessante, sedi pe bielece sedi pe elegance (Pierluigi Visintin, Friûl e furlans te Histoire de ma vie di Giacomo Casanova); al jere ancje un biel zovin e si sa che la bielece no fâs mai dam a chel che le à (Roberto Ongaro, Il muc)
   Sin. biel
3. s.f. alt valôr morâl:  la bielece di une esistence vivude secont la leç dal Signôr (Meni Ucel, Otavari a Madone)
4. s.f. persone o cjosse che e plâs pal so aspiet:  Marie e jere une bielece cu la muse spongjine e il voli clâr, un voli che al faseve insumiâ (Alan Brusini, Come tai romançs); ce bielece! In chê dì vin viodude a rivâ la prime cisile in cercje dal so nît (Pieri Somede dai Marcs, Fieste in famee); cheste Eline no jere chê che si dîs une bielece, e e veve i siei agns (Meni Ucel, Prioritâts)
   Sin. amôr , incjant¹ , lusôr , magnificence , maravee , sflandôr
5. s.f. (pop., ancje scherç.) tant che apelatîf par une persone che si trate in maniere confidenziâl o che si vûl fâi un compliment, ancje fûr di lûc:  "Ce volêso, bielecis? A son i câs de vite" (Carlo Sgorlon, Prime di sere)
   Sin. biel , amôr , ninin , nini
6. s.f. spec. tal pl., i aspiets plui biei e tipics, che a meretin di jessi visitâts, cognossûts, provâts e v.i.:  al varà mût ancje di viodi e di gjoldi lis bielecis dal puest (Alan Brusini, Gian Paolo Linda, I forescj); lis bielecis di une nature incontaminade e salvadie (Fabian Ros, Gnovis cine)
   Sin. gracie , dote , cualitât
   
   1. ancje di une persone, lis parts plui bielis dal so cuarp:  atletis ducj invueleâts che no vevin vergogne ma dome bielecis di mostrâ (Margarite Cogôi, La storie di Semre)
7. s.f. [CO] piçule magle scure te piel, viôt belece :  la muse plene di bielecis (Checo Tam, Pantianutis)

Polirematichis e espressions idiomatichis

• bielece dal mus loc.s.f.
• la bielece di loc.

Proverbis:

• la bielece e va e e ven, e je la bontât che si manten
• tor de bielece no si rosee