Dizionari de Lenghe Furlane

pûr¹  pûr  [FO]

1. av. par rinfuarcî, par dâ plui evidence a un concet, a une espression:  "Ve mo, us al vevi pûr dit, jo, che cu la pazience dut si comede!" (Roberto Ongaro, Cretevierte); "O ai capît. Nol covente nuie altri. Ma stait pûr sigûrs che no mi dismentearai di voaltris" (Gianni Gregoricchio, Trê feminis)
   Sin. ben , lafè , pursì
   Cfr. ancje , ancjemò
   
   1. (enf.) cun valôr di concession:  "No stait a vê rivuart, Eline, domandait pûr dut ce che o volês" (Franca Mainardis, Il sium di Lissandri); "Ben, lait pûr, che us spietarai" (Luigi Gortani, Meni Fari); cumò, Zuan nol veve plui dibisugne di lui, e che i ves pûr butât in muse chel ridi che si sfantave velegnôs come un strît di civuite (Maria Forte, La tiere di Lansing)
   2. [BF] tant che particule par zontâ alc:  jo ti jai copât senza marturizâti, essint che nel istès moment che scomençavin i dolôrs de la tô distruzion, tu piardevistu pûr la facoltât di sintîju (Zuan Luîs Filli, Il farc)
      Sin. ancje
   3. [BF] cun valôr aversatîf:  vuê, che no si varès bisugne di copâ par vivi, pûr si gjolt a viodi a patî (Cristina Noacco, Faliscjis)
      Sin. istès , in ogni câs , in dut câs , pursì
2. coniun. par introdusi une concessive:  il colôr de sô piel al mostrave subit che, pûr vivint in campagne, no faseve la contadine (Carlo Sgorlon, Prime di sere); pûr cjalt di sei furlan, […] par fevelâ di robis plui impuartantis, di materiâi e di traspuarts e di bêçs, al jere passât a fevelâ par talian (Agnul di Spere, Visâsi di chel puint radio)
   Sin. ancje , si ben che , cundut che , purpûr , a ben che

Polirematichis e espressions idiomatichis

• e pûr coniun.
• o pûr loc.coniun.
• pûr che loc.coniun.
• pûr di loc.coniun.
• pûr no loc.av.
• pûr se loc.coniun.
• pûr sì loc.av.
• pûr simpri loc.av.
• se pûr loc.coniun.

Proverbis:

• a vê pure la cussience, ogni ben si po spietâ