Dizionari de Lenghe Furlane

fâ ben    [AF]

1. loc.v. fâ une cualsisei ativitât tal mût coret e cun risultâts positîfs:  fâ prest no ûl dî simpri fâ ben, come che fâ ben no ûl dî simpri fâ prest: la utilitât vera l'è di fâ prest e ben (Federigo Comelli, Il me paîs); cuant che un, par esempli, al à un dovê public, fâ ben il propri dovê public e je caritât cristiane, al è amôr di Diu (Francesc Placerean, La predicje di une domenie cualunche)
2. loc.v. compuartâsi te maniere juste o intune maniere che e ven valutade in mût positîf:  "Sì Pieri, tu âs fat ben a vignî ca" (Dolfo Zorzut, Cimût che sant Pieri al è lât cul Signôr); "Brave Ane! fasês ben a tignî cont des nestris usancis" (Pieri Somede dai Marcs, Resurezion a Pontinie)
3. loc.v. compuartâsi in mût di judâ chei altris:  no si è sparagnade di fâ ben a ducj chei che a àn vût dibisugne (Josef Marchet, Lis predicjis dal muini); Vigje i cjapà la man par tornâle a bussâ, ma dibant: che siore Pine no voleve chês nainis. Par jê al jere avonde il gust di fâ ben (Maria Forte, Varc di confin)
4. loc.v. fâ stâ ben tal cuarp o ancje te ment, zovâ pe salût, pal umôr e v.i.:  i vecjos furlans a vevin une lôr opinion su lis medisinis. A disevin che lis medisinis in vendite a son miârs e miârs; che chês che a fasin ben a son nome une dozene (Riedo Pup, I furlans e lis medisinis); il soreli i faseve ben e chel aiarin fresc e pûr i jentrave tai polmons e i sclarive il cerviel (Pieri Menis, Chei di Muraie)
   
   1. puartâ un vantaç in gjenerâl o intun sens che si capìs dal contest, no dome pe salût:  i fâs ben ancje a lui di scoltâ un pont di considerazion de cuistion nazionâl furlane che nol è dome chel de tradizion autonomiste furlane (Adrian Cescje, Memoriis di politiche linguistiche)

Components:

• ben av., inter., s.m., coniun.
• fâ v.tr., s.m., v.intr.

Proverbis:

• a fâ ben in chest mont, si lu cjate in chel altri
• a fâ ben nol è ingjan, a dâ vie nol è vuadagn
• a fâ ben par fuarce, si ofint diu
• a fâ ben, si va in paradîs
• a fâ mâl, si lu cjate; a fâ ben, si lu piert
• a fâi ben al mus, si vanze pêts e scalçs
• a fâi ben al mus, si vanze scalçs
• a fâi ben al om ingrât, si reste bec e bastonât
• cui che i fâs ben al mus al vanze lis balotis
• cui che i fâs ben al om ingrât al reste bec e bastonât
• cui che si maride al fâs ben, cui che no si maride al fâs miôr
• cul fâur ben ai altris tu fasis ben par te
• lis robis grandis a fâlis ben trop timp al conven