Dizionari de Lenghe Furlane

pês¹  pês  [FO]

1. s.m. [FO, TS] fis. fuarce esercitade di un cuarp par efiet de gravitât de Tiere sore di un altri che lu ten sù:  la densitât dal aiar, ven a stâi il so pês par metri cubic, che al dipent dal numar di particulis che a son par ogni metri cubic, e je plui alte dongje de superficie e plui basse adalt (Stefano Micheletti, Marcellino Salvador, Notis di meteorologjie pal Friûl - Vignesie Julie); il so braç al tignive memorie dal pês di ogni palade di stancol… Ogni bochin tantis paladis… E nol sbaliave di une once. Come se al fos stât il cûr a sintî il pês (Maria Forte, La tiere di Lansing)
   
   1. valôr di cheste fuarce in unitâts di misure:  [lis cuessis par fâ i persuts] a vegnin cuviertis di sâl (tant che a son i chilos di pês) (Oscar Puntel, Un persut unic par un lûc unic); a son stadis rinfuarcidis lis struturis di sostegn de vascje (pês plui di 2000 t) de unitât 4 (Alessandro Pascolini, Il disastri de centrâl nucleâr di Fukushima Dai-ichi)
2. s.m. cuarp sogjet a fuarce di gravitât:  "Toni, il sac al è tornât parsore aghe. Cumò i ai metût un pês, e tu torne a butâlu" (Andreina Nicoloso Ciceri, Toni Mat - Racconti popolari friulani I)
3. s.m. toc metalic doprât par pesâ:  a 'ndi è che a robin ogni dì, di agns e agns incà, o su lis misuris o sui pês o sul marcjât o sul lavôr o su lis tassis o su altris afârs (Josef Marchet, Lis predicjis dal muini); e restà cu la belance in man e il pês che al dispicjave par tiere (Maria Forte, La fortune di Folope)
4. s.m. (fig.) malstâ, spec. sensazion di pression tal pet o tal stomi, dificoltât di digjerî o di respirâ:  Tite si svee… al sint come un grant pês sul pet… (Checo Tam, Vencul)
   Sin. grop
5. s.m. (fig.) compit di responsabilitât, responsabilitât che e domande impegn e fadie:  di cualchi an e puartave di bessole dut il pês de numerose famee (Catarine Percude, La brût)
   Sin. cjame
6. s.m. (fig.) cundizion di fastidi, di dolôr fisic o morâl:  chel pês [il sens di colpe] lu à tignût lontan di ducj e di bessôl; masse di bessôl e cul cûr come inzessât (Maria Forte, La tiere di Lansing); la solitudin… Ce pês su la anime! La solitudin e cove dentri di me (Gianni Gregoricchio, Trê feminis)
   Sin. grop , cjame
7. s.m. (fig.) impuartance, capacitât di produsi un efiet:  tal imagjinari coletîf i fenomens no son sintûts daûr dal lôr pês obietîf su la societât, ma daûr di trop e di cemût che si fevele di lôr (Sandri Carrozzo, Il Friûl tra conflit invisibil e alienazion); la publicitât e veve un pês [economic] fuart, ancje se no suficient par tignî sù l'imprest di informazion (Max Mauro, Un Friûl difarent: i 90 mhz di Onde Furlane)
   Sin. inflùs , impat , impuartance , influence
8. s.m. [CO, TS] sport imprest di metal par fâ esercizi fisic, par fâ lavorâ i muscui cuintri de fuarce di gravitât
9. s.m. [TS] sport sfere di metal doprade in atletiche intes garis di lanç
10. s.m. (fig., spres.) robe o persone che e da fastidi, che no covente, che no zove:  i partîts talians e i lôr soldaduts a son dome un pês (Dree Valcic, I partîts talians e i lôr soldaduts a son dome un pês)

Polirematichis e espressions idiomatichis

• a pês loc.av., loc.adi.inv.
• a pês di aur loc.av.
• a pês muart loc.av., loc.adi.inv.
• alçâ di pês loc.v.
• stâ di pês loc.v.

Proverbis:

• a chel pês che si compre, bisugne vendi
• cui che al tire il cuartês che al puarti il pês
• i purcits si ju stime a pês
• pês e misure a devin jessi, il contrat al è libar