Dizionari de Lenghe Furlane

principi  /-cì-/  prin|ci|pi  [FO]

1. s.m. il tacâ, il scomençâ e il moment, la fase o il lûc li che alc al scomence:  cumò o pues cirî di rispuindi a la domande che o vevi fat tal principi di chest cjapitul (Franc Fari, Il cjâf dai furlans); o pensìn che la grafie "j" e vebi di jessi conservade nome in principi di peraule (Xavier Lamuela, La grafie furlane normalizade)
   Sin. cjaveç , esordi , scomençament , tacâ , partence , inizi , viertidure
2. s.m. ce che al è la cause, la reson di alc:  [pai mîts che a stan daûr des contis dal miluç de magne] cerçâ il miluç nol è il principi de disgracie e la cause de pierdite dal Paradîs […]: al è invezit il fin e il compiment de esperience spirituâl (Sandri Carrozzo, Il miluç de magne)
   Sin. base , cjaveç , començament , fondament , fonde , font³ , implant , inviament , lidrîs , viertidure
3. s.m. spec. tal pl., fonde e criteri che al da dongje une sience, une dotrine, une dissipline, une pratiche e v.i.:  il testament biologjic al è une realtât. E no je in contrast cui principis religjôs (Christian Romanin, Amato De Monte: Il Friûl, patrie des bataiis di civiltât); intindiment de associazion fondade di un grup di possidents al jere chel di slargjâ tra i socis i principis di agronomie avanzade (Adrian Cescje, Liniis di storie sociâl e economiche dal Friûl 1500 - 1800)
   Sin. leç
   
   1. leç o enunziât che al da une interpretazion regolâr di cierts fenomens:  pes sôs carateristichis spaziotemporâls, il ciberspazi al pues contradî il principi de semantiche gjenerâl di Korzibsky che «la mape no je il teritori»: la virtualitât e pues vualivâ mape e teritori (Mario Turello, Il brevet); il "Principi di Indeterminazion" di Heisenberg al dîs che no si pues fâ tal stes moment domandis precisis su la posizion e su la velocitât di une partesele elementâr (Sergio Cecotti, Teologjie algjebriche)
4. s.m. pont teoric o convinciment che al devente norme di compuartament, di vite, di azion:  jo o soi fedêl a lis ideis che si fondin sui principis universâi di libertât e justizie (Alviero Negro, Int di masnade); l'ostîr, come ducj chei dal so mistîr, al veve par principi di no impaçâsi tes bataìcis dai clients (Roberto Ongaro, Il muc)
   Sin. cjanul¹ , convinciment , criteri , misure , norme , orientament , persuasion , precet , regule , valôr
5. s.m. [TS] filos. essence origjinarie
   Sin. archè
6. s.m. [TS] chim. costituent fondamentâl di une sostance che al definìs lis sôs carateristichis
   
   1. [CO] sostance che e à une cualchi proprietât:  lis pontis [dal blaudin] si scuen cjapâlis sù adore a Vierte, cuant ancjemò no àn dentri principis iritants e si mangjin bulidis come i sparcs in tante aghe salade (Giorgio Pascoli, Il Litum: jerbis salvadiis te cusine)

Polirematichis e espressions idiomatichis

• dal biel principi loc.av.
• dal bon principi loc.av.
• di biel principi loc.av.

Proverbis:

• ducj i principis a son debii
• il prin principi al è pesant
• ogni principi al coste fadie