Dizionari de Lenghe Furlane

regule  /rè-/  re|gu|le  [FO]

1. s.f. ordin costant che si manten intal svilup di une cierte cjadene di fats:  i cambiaments des lunis si po induvinâju, cuntun calcul di nuie, a secui di distance: a van daûr di une regule che no po falâ se dut il firmament nol va in grum (Josef Marchet, Preambul rusin)
   Sin. leç
2. s.f. formule che e fisse il mût di fâ intun ciert câs o intune ativitât, determinade di une autoritât, di une convenzion, di une tradizion, di une esperience e v.i.:  al veve di esisti dal sigûr cualchi sorestant metût li a fâ rispietâ lis regulis di chei che a comandin (Agnul di Spere, Visâsi di chel puint radio); Pauli Brian al è un di chei cudumars che a crodin di mostrâsi brâfs infotantsi di dutis lis regulis dal vivi (Josef Marchet, Lis predicjis dal muini); o levi a provis di bande cul vecjo mestri Silvio, chel che nus insegnave lis regulis dal Pentograma, come che lu clamave lui (Checo Tam, Avengers); ogni toc [dai scacs] si môf daûr di regulis precisis e ancje particolârs (Nilde Teresa Negro, Zuìn di scacs)
   Sin. leç , precet , norme
3. s.f. [TS] mat. metodi pratic pe soluzion di problemis o pe esecuzion di calcui
4. s.f. [TS] religj. complès di normis e prescrizions fondamentâls che a dissiplinin la vite di un ordin religjôs:  nissun nol à vût il cûr e la onestât di fermâlu, di judâlu a stâ tal so puest, a onorâ la sô tonie e la sô regule (Antoni Beline, Un frari pôc fedêl); il mont monastic […] al veve une diete principalmentri vegjetariane, la cjar dal purcit e ven dispensade come medisine pai fradis che si inmalin. Si lu lei te regule di Sant Benedet (Angelo Floramo, Il purcit: dal "tragos" grêc a chel furlan)
   
   1. l'ordin stes che al va daûr di chês normis e prescrizions:  il re Astolf, tor il 752, cui siei munics al tirà sù la glesie e il monasteri di Nonantule […] metintlu sot de regule di sant Benedet (Carlo Dorligh, Sants e Santis de nestre tiere)
5. s.f. [TS] ling. prescrizion di un ciert ûs linguistic:  un model diferent di manuâl, cuntune part che e introduseve la alfabetizazion par regulis esplicitis e esercizis di pueste par ogni regule di scriture (Adrian Cescje, Memoriis di politiche linguistiche)
   Sin. leç
6. s.f. moderazion, ecuilibri savi e just tal vivi, tal fâ lis robis o intune singule azion:  jo e la mê femine o sin lâts in cercje di tirâ sù i fruts cun regule (Luciano Rocco, La foghere)
   Sin. ordin , control , fren , moderazion , ecuilibri , sintiment , misure , criteri
7. s.f. cundizion normâl, ordenarie, solite:  une classe pulitiche regjonâl pôc o par nuie cussiente dal valôr de specialitât, che a varès di jessi la regule, no la ecezion tes regjons talianis (Gianfranco Ellero, Gjeremie Gomboso, Preambul di Friuli. Autonomia e territorio)
   Sin. solit¹ , norme , normalitât

Polirematichis e espressions idiomatichis

• meti in regule loc.v.
• metisi in regule loc.v.
• vê lis cjartis in regule loc.v.

Proverbis:

• ogni regule la sô ecezion