Dizionari de Lenghe Furlane

leç  /-è-/  leç  [FO]

1. s.f. enunziazion di une norme fate di une istituzion:  sul spirâ dal secul vincjesim, ai 15 di Dicembar dal 1999, il Parlament de Republiche al fasè il sfuarç di aprovâ une leç gjenerâl des minorancis linguistichis (Adrian Cescje, Memoriis di politiche linguistiche); a partî dal 1996, e de leç n. 675 di chel an - cognossude come "leç su la privacy" - […] un grum di segretaris comunâi a interpretin la leç in maniere restritive e a inderedin l'acès a lis listis eletorâls, ancje par motîfs di ricercje sientifiche (Linda Picco, Ricercje su la condizion sociolenghistiche dal furlan)
2. s.f. complès des normis che a formin l'ordenament juridic di un stât:  leç e je leç. E la leç e va rispietade e osservade. Simpri (Riedo Pup, La none in cuço e Cutolo assolt); la cuistion le viodeve sot la lûs dal Codiç Civîl, la sô mentalitât e jere simpri peade a la leç (Carlo Sgorlon, Ombris tal infinît)
   Sin. dirit , legjislazion , ordenament
3. s.f. denominazion comune de facoltât universitarie di jurisprudence:  Toni come il nono, laureât in leç a Padue (Alan Brusini, Come tai romançs); mi soi cjatât, jo a pene indotorât in leç, insom di un grant camaron plen di impleâts (Pieri Somede dai Marcs, Sant Simon: 28 di Otubar 1917)
   Sin. dirit , jurisprudence
4. s.f. autoritât judiziarie:  i paris di famee, i aministradôrs, i predis e dute la int di sintiment a tentavin fin tal ultin di convinci i barufants a no impaçâsi cu la leç (Riedo Pup, Il furlan al jentre in tribunâl)
5. s.f. costante che e guvierne cu la fuarce de necessitât un cualsisei aspiet de realtât:  ognidun di nô […] al scuen adatâsi a lis cjamis che la leç di nature i poie su lis spalis (Gianni Gregoricchio, Trê feminis); lis bestiis e lis plantis a son vivûts insiemi, rispietantsi e scombatintsi secont leç naturâls plui grandis e plui antighis dal om (Riedo Pup, I furlans e la cjace)
   Sin. norme
   
   1. [TS] sient. relazion costante e regolâr che e passe tra cierts fats o fenomens, tant che par ciertis causis a seguissin cierts efiets; ancje la formule matematiche o la espression linguistiche che a esprimin cheste relazion:  o podìn fâ l'assum che al cognossès ancje chê che e ven clamade "seconde leç di Ohm" (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); l'univiers ridusût a un pont al è singolâr e nol à sens aplicâ lis leçs fisichis cognossudis par studiâ la fisiche di chel pont - ven a stâi par studiâ l'istant de creazion dal mont (Sergio Cecotti, Teologjie algjebriche)
6. s.f. (fig.) robe che no si met in discussion, che e à valôr assolût:  la usance e je leç (Alviero Negro, Int di masnade)

Polirematichis e espressions idiomatichis

• a norme di leç loc.av., loc.adi.inv.

Proverbis:

• cui che al fâs lis leçs al à di rispietâlis
• fate la leç, pensade la malizie
• fate la leç, pensât l'ingjan
• la leç e je fate colpe dai triscj
• la necessitât no cognòs leç
• miserie no à leç
• necessitât no à leç
• necessitât romp leç
• no je mai fate la leç che pensât nol sei l'ingjan
• pat romp leç
• tal cjaveç nissun met leç