Dizionari de Lenghe Furlane

s.f. azion e efiet di persuadi, di convinci, di fâ acetâ e cjapâ sù une opinion: lis istituzions incargadis [...] al coordinament des politichis di tutele e svilup de lenghe furlane a varessin di inviâ une strategjie organiche di penetrazion e persuasion tal mont dal cumierç (Raimont di Strassolt, Marcjât e cuistion furlane)
Sin. convinciment
s.f. opinion, idee che si à, che si cjape sù o che si ten cun sigurece: al impuarte [...] che il talian ancje dopo di jessi stât, metìn a dî, in Svuizare o in Svezie, al seguiti a crodisi il pionîr, il puartebandiere de civiltât e si cuieti in cheste persuasion (Josef Marchet, Il manarin tal cûr)
Sin. convinzion , convinciment
s.f. fuarce tal crodi une idee, une opinion: a dî la veretât, o ai tante pocje persuasion... Jo o cjati che une sole midisine a mi fâs propit ben: a je chê che la mê siore e mene ator là dentri inte cusine (Costantino Smaniotto, Il speziâr)
Sin. convinzion