comant
/-à-/
co|mant
[FO]
-
s.m.
istruzion o indicazion dade cun autoritât, che e à di jessi ubidide:
ce che e diseve la Baldasse al jere simpri un comant in chê cjase aromai pleade a jê (Maria Forte, Cjase di Dalban);
al marcje, al bat il tac in divise nere e al rispuint ai comants par todesc, lenghe che al cognòs ben, vint lavorât di zovin in Svuizare (Checo Tam, Mors tua, vita mea)
Sin. comandament
, comande
, disposizion
, imposizion
, ordin
-
s.m.
funzion, autoritât, podê di dâ istruzions o indicazions che a àn di jessi ubididis:
i todescs a cjaparin in man il comant ancje in Libie, ma nancje a lôr ur le drete (Francesc Placerean, Cuintristorie dal Friûl dal 1866 fint in dì di vuê);
par putrope int - par dute chê int che e vîf cu la mangjadorie burocratiche - si trate di difindi posizions di comant e interès capitâi, si trate di tignî scuindudis un grum di rognis cumbinadis in passât (Josef Marchet, 80 discors);
nol veve nissune intenzion di molâ il comant che, etât o no etât, al jere ancjemò un om plen di vite e di fûc (Gianni Gregoricchio, Trê feminis);
cui che nol è al comant o che nol à vonde podê daûr la gole che al à (Riedo Pup, Innsbruck Bonn e Avellino);
dopo la muart di so pari, la farie e jere restade su lis sôs spalis di frut, par chel che al rivuardave il lavôr, ma la direzion, lis redinis, il comant espotic, tes mans di done Jacume (Roberto Ongaro, Cretevierte)
Sin. control
, denant
, direzion
, domini
, guvier
, podê2
, prin puest
-
s.m.
capacitât di controlâ une part dal cuarp, un istint, une voie, une dibisugne e v.i.:
la fam no à comant, si sa (Maria Forte, "Nossent");
e veve vût un ictus, in seconde elementâr, intant che e jere a scuele, dibot e à pierdût la fevele e il comant de bande diestre dal cuarp (Franc Fari, Il cjâf dai furlans);
dopo nol vaì; nome che il stomi si alçave e si sbassave cence comant, che nol podeve fermâlu (Riedo Pup, Dreute)
-
s.m.
sumission a un ordin, a une autoritât, a une jerarchie, a une norme morâl o di convivence e v.i.:
il piês, a la Ane i capitâ cu la ete malnassude e disordenade di Menoli, di Milo Taboghe, di Dolfo dal Asin, dal Piçul de Rosse che a vevin il tîr de tristerie. Fruts cence comant e cence vergogne (Maria Forte, La aghe dal Ariul)
Sin. dissipline
, regule
, ordin
, rispiet
-
s.m.
milit.
tes fuarcis armadis, il grup costituît dal comandant e dai siei colaboradôrs o il lûc dulà che a stan:
in cjase nestre da plui di un mês o vevin il comant dai dragons dal «Gjenue Cavalarie» (Pieri Somede dai Marcs, Une conference di padre Gemelli);
considerât finît il so compit, al le al comant imperiâl a consegnâ la sô spade, ma li i diserin che al podeve tignîle, stant che al si jere compuartât cun onôr (Giovanni Pillinini, Zuan Batiste Cavedalis - Une vite esemplâr)
-
s.m.
amin.
proviodiment che al mande un impleât a lavorâ intune aministrazion diferente di chê solite
-
s.m.
tecn.
orghin che al guvierne un dispositîf, un mecanisim, une machine:
al montà dentri [in machine] e al provà ducj i botons. Cjatât chel just, al fracà sigûr e al partì, a salts. Al rivà fint a Visepente. Po dopo al tacà a confusionâsi, a viodi dome tarlupulis, a tremâ, a sbaliâsi tai comants (Antoni Beline, Pre Pitin)
Polirematichis e espressions idiomatichis