Dizionari de Lenghe Furlane

disposizion  /-òn/  dis|po|si|zi|on  [FO]

1. s.f. il jessi metût intun ciert puest, intun ciert ordin e v.i.:  mi à plasude ancje la sielte e la disposizion de mobilie (Gianni Gregoricchio, Trê feminis)
   Sin. asset , distribuzion , logament , plaçament , posizion , sest , sistemazion
   
   1. il mût, l'ordin che cdn. o alc a son disponûts:  la disposizion dai cuadris; la disposizion des plantis
      Sin. asset , distribuzion , logament , plaçament , posizion , sest , sistemazion
2. s.f. maniere di pensâ e di fâ:  vê une disposizion colaborative cui compagns di vore
   Sin. estri , spirt , umôr , ande
3. s.f. inclinazion naturâl o spontanie:  De Nittis par Eve al veve simpatie, plui di dut par vie de sô imagjinative cence brenis e de sô disposizion viers la piture (Carlo Sgorlon, Ombris tal infinît); la çampe e à un debil, une disposizion plui pronte a capîju e a condividiju (Adrian Cescje, Memoriis di politiche linguistiche)
   Sin. atitudin , capacitât , estri , inzen , pendence , predisposizion , talent , tindince , vocazion
4. s.f. il fat e il risultât di comandâ, decidi e v.i.:  la sere dal 23 [Cavedalis] al fo a Vignesie par fevelâ cun Manin e dâ lis primis disposizions par che dut si davuelzès cun ordin (Giovanni Pillinini, Zuan Batiste Cavedalis - Une vite esemplâr)
   Sin. befel , comandament , comande , comant , decision , deliberazion¹ , ordenazion , ordin , risoluzion
   
   1. ce che al è prescrit in maniere uficiâl:  il comun, che al à personalitât juridiche, al sta sù su lis normis di chest statût e des disposizions regolamentârs di metude in vore (Aministrazion Publiche, Statût dal Comun di Udin); promessis solenissimis, confermadis cun disposizions di leç, cun ratifichis internazionâls (Josef Marchet, E se no nus dassin la autonomie)
      Sin. norme , precet , prescrizion , risoluzion
   2. volontât, decision:  [Jaroni Aleandro] al murì a Rome sul scomençâ dal 1542 e al fo sepulît a S. Grisogono, ma po al vignì traspuartât a Mote secont lis disposizions lassadis tal testament (Renzo Balzan, Ladins dal Friûl, XIX, 10)
      Sin. volontât , volê² , sielte , decision , deliberazion¹ , ordin , risoluzion
5. s.f. [TS] med. tindince a cjapâ sù infezions o malatiis
6. s.f. [TS] ret. te ret. classiche, ordin dai argoments e des parts intun discors
   Sin. dispositio
7. s.f. [TS] burocr. misure dissiplinâr o preventive adotade de bande di un superiôr o di une autoritât
8. s.f. [TS] sport intai sports di scuadre, mût di tignî lis posizions di une formazion di zuiadôrs in cjamp
9. s.f. [TS] sport intal automobilisim, posizion des machinis prontis par partî

Polirematichis e espressions idiomatichis

• a disposizion loc.av., loc.adi.inv.
• a disposizion di loc.prep.