Dizionari de Lenghe Furlane

umôr  u|môr  [CO]

1. s.m. part licuide di alc:  el soreli i gjave l'umôr che ja vût da rosade ta gnot al forment (Dolfo Zorzut, Mi ûstu ben?); se invezit o volês un bon brût, metêt dut te aghe frede, e lassait che, intant che chê si scjalde, i umôrs de cjar a rivin a saltâ fûr a planc a planc (Margherita Timeus, Il brût, la linfe dal Invier); fueam tenar e plen di umôr (Mario Martinis, Il grant lunari dal Friûl. Avrîl)
   
   1. [LE] aghe:  nel fresc so umôr [de fontane] si lavin lis personis (Toni Broili, Il furlan in Parnâs)
2. s.m. [CO, TS] med. fluit dal cuarp, soredut te concezion mediche antighe, ognidun dai cuatri fluits corporis, che se a son in ecuilibri a son la fonde de buine salût:  la nestre piel je dute porose, fait cont come un draç: e je fate cussì par scjariâ fûr i umôrs dal cuarp (Giuseppe Ferdinando del Torre, La fie capriçose e il contrabandîr)
3. s.m. inclinazion, cundizion psicologjiche, soredut transitorie:  mi informi cemût che a son lis robis, in ce stât che a jerin lis financis dal comun, l'umôr de int (Pieri Somede dai Marcs, A è lade cussì...); Tomâs si sfuarçave di cjatâ fûr un pinsîr che al ves pudût judâlu a sclarîsi l'umôr (Mario De Apollonia, Il timp par ledrôs)
   
   1. fuarce di caratar:  di salût al jere malon ma di umôr a 'ndi veve tant tant, ma tant ancje di vendi (Artemisio Piccini, Une benedizion un pôc strane)
   2. inclinazion naturâl dal caratar:  siore Marie / à cuatri fîs e ducj di umôr diviars, / e ducj di diferent fisonomie (Pieri Çorut, Ducj somein so pari)
   3. [LE, FÛ] intenzion, volontât:  sintît, se jo soi vignût mat di leâ: / al mi è saltât umôr di poetâ (Ermes di Colorêt, I, 195); ahi mo l’à umôr Francês ducj di disfâ / in mont, in plan ju pesta, e el para via / e di fruçâ i nimîs, mai si ûl mendâ (Zomarie Marussig, Se l'è nassût Eugenio piemontês)
      Sin. intenzion , volontât , voie , brame , desideri
4. s.m. tal sing., maniere di jessi o di fâ legre, scherçose o robe che si dîs o che si scrîf par fâ ridi:  encjemò un pôc di umôr [rubriche di barzaletis] (Fogolâr Furlan NSW, Sot la nape)
   Sin. spirt , umorisim