Dizionari de Lenghe Furlane

unitât  u|ni|tât  [FO]

1. s.f. il fat di jessi un, ugnul, sôl, in contraposizion cu la pluralitât o la molteplicitât:  un univiers concludût, jerarchic, ordenât dal sempliç al complès, de unitât ae molteplicitât (Mario Turello, Il brevet)
   
   1. [TS] religj., teol. inte teologjie cristiane, atribût di Diu che al è une sostance sole in trê personis:  cetantis glesiis no sono intituladis ae Trinitât e Unitât di Diu!? (Ernesto Bianco, Trê in un)
2. s.f. carateristiche di jessi un dutun, pûr jessint formât di plui parts:  [i furlans] si augurin che ancje la Italie si convinci che cheste e je la vere unitât: ognun salvâ e vivi la proprie culture e rispietâ, studiâ, cognossi e imparâ da la culture di ducj chei altris (Riedo Pup, Fûr che al vegni cui che al è stât); l'om al à plui dimensions, ma al è unitât (Antoni Beline, Sant Jacum, là che al finìs il mont)
   Sin. union , unitarietât
3. s.f. corispondence armoniose fra lis parts che a formin un dut organic:  i riferiments culturâi che van dal arcaisim des civiltâts precolombianis, ae caligrafie dal soreli jevât, al informâl, al Grêc, ai Venezians, a son puartâts a une unitât tes sculturis e tai cuadris [dai fradis Basaldella] (Bepi Agostinis, Storie de art in Friûl)
   Sin. union , unificazion , dutun
4. s.f. union o unificazion politiche:  Gioacchino Murat […] al veve tentât di metisi a la direzion di un moviment in favôr de unitât di Italie (Giovanni Pillinini, Zuan Batiste Cavedalis - Une vite esemplâr)
   Sin. unificazion
   
   1. complès politic o aministratîf che al risulte dal dâsi adun di plui sogjets:  il Stât patriarcjâl, tant che ogni unitât feudâl, al fo saborât di barufis e di vuerucis, che tra i siôrs parons o sotparons no mancjarin mai (Josef Marchet, Cuintristorie dal Friûl fin sot la Italie)
5. s.f. concuardie di pinsîrs o di azions:  tal Congrès gjenerâl a Setembar si podè palpâ vive la unitât che o jeri rivât adore a tornâ a dâ dongje intor de idee nazionalitarie furlane (Adrian Cescje, Memoriis di politiche linguistiche)
   Sin. acuardi , armonie , coesion , cunvigne , union
6. s.f. [TS] mat. il numar un considerât tant che principi de numerazion
   
   1. element o individui che al pues jessi contât:  tal 2012 i turiscj talians a son stâts stimâts in cuasi 104 milions di unitâts (Attilio Celant, Il rûl economic dal turisim in Italie)
   2. metrol. base di une scjale di misurazion:  il bit e je la unitât par misurâ la informazion e al corispuint ae informazion produsude cuant che si verifiche un dai doi events ecuiprobabii (Valentino Castellani, La societât de informazion: cirint lis origjins)
7. s.f. complès di personis che a fasin une ativitât specifiche intun ciert setôr:  bielzà te dì dal taramot, sore sere, a son rivadis tal Abruç dôs colonis di socoridôrs furlans […] e tredis unitâts cinofilis pe ricercje dai ferîts (Piero Cargnelutti, Taramot: ce che al insegne il Friûl )
   Sin. scuadre , grup¹
   
   1. part di une struture cun funzions specifichis:  in ogni unitât de centrâl [nucleâr] e je une vascje di imagazenament posizionade dongje dal nusel dal reatôr (Alessandro Pascolini, Il disastri de centrâl nucleâr di Fukushima Dai-ichi)
      Sin. part¹ , sezion
   2. [TS] med. intune struture sanitarie, il lûc li che si fasin servizis e terapiis specifichis:  l'ospedâl al veve di vierzi une unitât coronariche (Carli Morandin, Interviste a Attilio Maseri)