Dizionari de Lenghe Furlane

schene  /-èn-/  sche|ne  [FO]

1. s.f. part daûr dal bust dal om o des bestiis, contrarie al pet e al stomi:  la Malie, di un pâr di dîs incà, no je a plomp: i zire il cjâf, e sint doloruts jù pe schene (Meni Ucel, Tant parom); preâ il Signôr di vê salût, di no inmalâsi mai e di lavorâ fin che la schene lu tignive sù (Riedo Pup, I furlans e la pension); un sgrisul lunc i saetà jù pe schene, fin tes gjambis, come un spac (Dino Virgili, La massarie); al mandà indenant lis bestiis sflocant la scorie parsore de lôr schene (Pieri Menis, Chei di Muraie)
   Cfr. dues
   
   1. (fig.) in espressions che a pandin l'oblic o la capacitât di tignî sù une situazion, di frontâ dificoltâts e v.i.:  Cavedalis, che pûr si jere oponût a cheste decision, al si cjatà su la schene une cjame di responsabilitâts (Giovanni Pillinini, Zuan Batiste Cavedalis - Une vite esemplâr)
2. s.f. (fig.) cualsisei struture o forme che e pues someâ a chê part anatomiche, spec. in riferiment ae part disore o di daûr di alc:  cualchi borc indurmidît tal scûr, po, plui scure, la schene dal cuel dal Fum (Maria Forte, L'avôt); e miôr si viodin lis schenis dai côi di tiare menâts tai agns dal Tiliment, i ramaçs ingropâts, strucâts ator di un alc (Stiefin Morat, Donald dal Tiliment)
   
   1. part daûr di alc:  la schene dal libri; la schene dal curtìs
      Sin. cueste
      Cfr. dues , ledrôs , daûr
3. s.f. [CO, TS] enol. struture e gradazion alcoliche dal vin:  devant di un cuartin penç di pulie o di un tai saurît di aleatic di buine schene (Osiride Secco dai Juris, Il Bacaro al va vie)
4. s.f. [TS] sport stîl di nadâ a muse insù
   
   1. ancje tant che adi.inv.:  200 m schene

Polirematichis e espressions idiomatichis

• a schene loc.av.
• agâr de schene loc.s.m.
• butâ la crôs su la schene loc.v.
• butâ te schene loc.v.
• butâsi te schene loc.v.
• crôs de schene loc.s.f.
• dâ la schene loc.v.
• dâi di schene loc.v.
• mâl di schene loc.s.m.
• medole de schene loc.s.f.
• menâi di schene loc.v.
• meti cu la schene al mûr loc.v.
• netâ il polvar su la schene loc.v.
• onzi la schene loc.v.
• pleâ la schene loc.v.
• rompi la schene loc.v.
• rompisi la schene loc.v.
• schene drete loc.s.f.
• vê buine schene loc.v.
• voltâ la schene loc.v.
• zirâ la schene loc.v.

Proverbis:

• a contâ balis, no dûl la schene
• a fâ sù pe schene di chei altris, nol dûl
• a freâi la schene al gjat, al drece la code
• a imprometi no dûl la schene
• a prometi no dûl la schene, ma ben a puartâ il fas
• cui che nol à mâl sù pe schene nol devente ros
• freii la schene al gjat che al dreçarà la code
• la bramazion e ven, e va; po e torne su la schene di cui che le da
• o di schene o di pet, o vin ducj il nestri difiet
• par fâ il predi al covente: orele di marcjadant, bocje di purcit e schene di mus