Dizionari de Lenghe Furlane

matucel  /-èl/  ma|tu|cel  [CO]

1. adi., s.m. che, cui che al à un compuartament strani, ideis straniis, che nol resone in maniere normâl:  o ai il vizi di pensâ a alte vôs tant che o somei un matucel (Checo Tam, La codebuie)
   Sin. mataran , maturli , strambel , mataniç , matescul , strambere , murlac , matuç , mat
   
   1. (fig.) ancje di elements inanimâts, animâi, events e v.i., che si movin di un continui o a sucedin in maniere iregolâr, che no si rive a previodi:  [i fruts] si butavin e si sburtavin come passaris matucelis te inmensitât dal cîl (Antoni Beline, La fabriche dai predis)
      Sin. mat , matuç , mataran , balarin
2. adi., s.m. che, cui che i plâs la ligrie, che si compuarte in maniere legre o ridicule:  "Voaltris, talians - dissal - vait a cjase contents, che, dopo, o vignarês a judânus." "Ben se o deventais gneurs" al cisicà chel matucel di Jacum dal Muini; ma chei altris a stavin suturnos e come scoreâts (Maria Forte, "Nossent")
   Sin. bacanon , brighele , burlon , compagnon , fraion , fraiot , purcjinel , ridicul , zuiatulon , bufon , paiasso , mataran , zugulon , mataniç , matescul , matuç