Dizionari de Lenghe Furlane

mat  mat  [FO]

1. adi., s.m. che, cui che al à une menomazion des facoltâts mentâls:  [Freud] al fo un dai prins a usmâ la esistence di plui personalitâts intun individui. Chestis ideis i vignirin cul cirî di judâ e di studiâ lis personis gnervosis e i mats che al veve in cure (Franc Fari, Il cjâf dai furlans); al barbote chel altri e se moche tal palaç dai telefons, convint di vê vût da fâ cuntun mat vignût fresc fresc di Sant Svualt (Arturo Feruglio, Viaç a Vignesie); Guri al zigà a fuart, come mat (Dino Virgili, La aghe da pît la cleve)
   Sin. dement , psicopatic , scuilibrât
   
   1. che, cui che al à un compuartament irazionâl ancje cence vê une patologjie, ancje in espressions iperbolichis, domandis retorichis e v.i.:  sêstu mat di fevelâ cussì, propit culì, no sâstu che i vûl prudence? (Pieri Somede dai Marcs, Un pugn di moscjis)
      Sin. fûr , fûr cu la cassele , fûr cul cjâf , fûr cul cjast , fûr dai semenâts , fûr di cjâf
2. adi., s.m. cun ûs averbiâl o in locuzions averbiâls o in comparazions al pues dâ valôr di superlatîf:  Febo al coreve come un mat intes braidis, saltant i riui come un zupet (Checo Tam, Domenie di cjace); i mucs che e jerin li parsore, su la crete plui alte, a traevin come mats (Pieri Menis, Tinut di Libro); o soi stufe mate ancje jo, plui di te (Costantino Smaniotto, Co l'amôr al cimie); une gole mate di maridâsi (Pieri Somede dai Marcs, A la oselade); par parâsi dal scjafoiaç dal dopodimisdì, no mancjavin di lâ a nadâ te sfondare di Montagnôl. O gjoldevin di mats (Lucio Perès, Tal Cuar)
3. adi., s.m. stramp:  une lûs zale, cjalde come l'aur, che e lave a dissegnâ schiribiçs e formis matis su lis colonis, sui mûrs, su lis musis de int (Pieri Menis, Il pignarûl)
   Sin. estrôs , matucel , maturli , strambel , stramp , stravagant
4. adi. che nol è stabil, che no si rive a capî, a previodi, a individuâ e v.i.:  no si capìs ben… e je une lûs mate che e cambie colôr, che e somee saltâ di ca e di là tra lis ramascjis di pôi (Checo Tam, Cirî gnot)
   Sin. balarin , maturli , morbit , strambel , stramp
5. adi. no vêr, no autentic:  al prove a muardi cui dincj la monede di arint par viodi se e je mate (Alan Brusini, Come tai romançs); la lidrîs [di tale] si gjave di Sierade; e je une vore mare (une volte si doprave come surogât, par fâ il cafè mat) (Giorgio Pascoli, Il Litum: jerbis salvadiis te cusine); e veve ancjemò intor il vistît di fieste e ator dal cuel un fîl di perlis matis (Carlo Sgorlon, Prime di sere)
   Sin. contrafat , fals , falsificât
   
   1. no naturâl, artificiâl:  i nestris muarts nus an lassade robe vere: cjamps, cjasis, culture, valôrs, bêçs vêrs. Podìno puartâur un mac di rosis matis e cjalâju in muse? (Antoni Beline, Capî la muart par capî la vite); al à mieçs i dincj mats in bocje (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   2. no just, no precîs:  il pipin de meridiane al segnave oris matis (Dino Virgili, La aghe da pît la cleve)
6. adi. di part dal cuarp, malformade, mâl cressude o che e funzione mâl:  cjar mate; ongule mate; passe une ore impins cu la sô gjambe mate, cuntun braç su lis spalis di mê mari che i faseve di sbacjo (Alan Brusini, Come tai romançs); il gno cûr mat, il so bati ledrôs, i mancjaments, il flât che nol torne (Laurin Zuan Nardin, Cui sêstu?)
7. adi. di plante, salvadie o lassade cressi a salvadi vie e che no da pomis buinis:  dilunc dal cei da la aghe la jerbe mate e jere folte e grasse (Dino Virgili, La aghe da pît la cleve)
8. s.m. [BF, TS] tecn. piertie che si pues movi sù e jù par aurî aghe in cierts poçs

Polirematichis e espressions idiomatichis

• a mat loc.av., loc.adi.inv.
• a mat vie loc.av., loc.adi.inv.
• barete mate loc.s.f.
• chebe di mats loc.s.f.
• cjar mat loc.s.m.
• cjastinâr mat loc.s.m.
• dâ di mat loc.v.
• dâ fûr di mat loc.v.
• fâ il mat loc.v.
• lâ mat loc.v.
• morâr di more mate loc.s.m.
• parussule mate loc.s.f.
• robis di mats loc.s.f.pl., loc.inter.
• rocje mate loc.s.f.
• stie di mats loc.s.f.
• vignî il mat loc.
• vignî sù il mat loc.

Proverbis:

• a cui che al cjale il so fat, no si po dâi dal mat
• a cuinçâ la salate al vûl un mat a meti il vueli e un savi l'asêt
• a un mat, un mat e mieç
• ai mats e ai parons nissun no ur comande
• al è miôr un cjaval fat che no un puieri mat
• al sa plui un mat a cjase sô che no un savi a cjase di altris
• bielis peraulis e cjatîfs fats a incjanin savis e mats
• ce colpe aie la gjate se la massarie e je mate?
• cjace che no si viôt e je cjace mate
• cu lis bielis peraulis e i bruts fats si ingjane savis e mats
• cui che al cjante in taule e in jet al è un mat perfet
• cui che al è mat che si fasi leâ
• cui che al è mat nol vuarìs mai e se al vuarìs al è fortunât assai
• cui che al sta in fidance dai altris al pie di mat
• cui che i da il dêt al mat, al vûl il dêt cun dut il braç
• di carnevâl ogni mat al vâl
• di ogni dì al ven Nadâl e di martars Carnevâl, di joibe a ven la Sense: a son ducj mats cui che le pense
• ducj à gust di viodi mats in place ma no dai siei
• femine pelose o mate o virtuose
• fi sôl: o mat o lôf
• fidance di altris, cjapiel di mat
• i fruts e i mats a àn simpri l'agnul custodi a vuardâju
• i mats no àn stagjon ni di Istât ni di Invier
• il mat al bute il clap tal poç e il savi al scuen gjavâlu
• il mont al è un ospedâl di mats
• la femine daben e fâs la cjase, la femine mate le disfe
• la femine savie e drece la cjase e la mate le strucje
• la robe no sta cui mats
• mat di piçul, om di grant
• mat di zovin, om di grant
• mats e fruts a puedin dî ce che a vuelin
• mats, feminis, paron, timp e cûl fâs ce che al vûl
• ni cun mats ni cun baraçs no bisugne impaçâsi
• ogni mat al pâr savi cuant che al tâs
• par cuinçâ ben il lidric al vûl: pal vueli un avâr, pal asêt un moderât e a messedâlu un mat
• rispiet pai viei, pazience cui mats e sopuartâ lis malis lenghis
• se la massarie e je mate, no stâ dâi la colpe a la gjate
• sperance dai altris, cjapiel di mat
• un mat a meti il vueli, un savi a meti l'asêt
• un mat al fâs mateâ cent savis
• un mat ind fâs cent
• un solt butât vie di un mat, al è racolt di un savi
• une ore ogni mat al lavore