Dizionari de Lenghe Furlane

ploie  /-ó-/  plo|ie  [FO]

1. s.f. precipitazion di gotis di aghe che a colin dal cîl:  te gnot e a buinore al veve plot. O cetant buine chê ploie dopo tant sut (Pieri Somede dai Marcs, La ultime firme de mê podestarie); al è il rogant. La ploie e bat sul barcon; i tons a crevin il cîl. O sint lis gotis che a colin sul veri (Checo Tam, Ombris); dopo vot dîs di ploie la aghe de Sfueime e jere cressude di fâ pôre (Alan Brusini, Amîs come prime); ce staiso li a fâ i poltrons, no viodêso che e ven la ploie? (Pieri Menis, Lis leiendis di Buie); se chest timp a nol fâs ploie / jo doman o ai di partî / ma o partìs di male voie / e il gno cûr tal lassi a ti (Popolâr, Se chest timp a nol fâs ploie)
   Var. ploee , pluoie , pleie² , plove , plee²
   Cfr. plovisine , sbivicje , sglavin , scravaç , diluvi , montane , ploiam , plote
2. s.f. bondance di cjossis che a colin dal alt:  chê cjosse, che le clamavin Skylab, e sarès lade cussì in cualchi pieç grandon e tune ploie di framents di açâl, di titani e di plomp (Agnul di Spere, La pôre di Fidrì Job); si sintì un sclop, une ploie di sclesis a restarin ingrumadis par tiere (Galliano De Agostini, L'ultin spieli)
3. s.f. [TS] cinem. efiet otic di riadure che si à tantis voltis cuant che si proietin peliculis vieris e sgriadis

Polirematichis e espressions idiomatichis

• can da ploie loc.inter., loc.s.m.
• fâ il bon timp e la ploie loc.v.

Proverbis:

• arc di Sant Marc o bontimp o ploie fuart
• Avrîl al vûl ploie par sutîl
• cercli lontan, ploie vicine; cercli vicin, ploie lontane
• cuant che al cjante il cuc, une dì ploie, une dì sut
• cuant che al tone, o ploie o tampieste
• cuant che e cjante la rane, a ven la ploie
• cuant che e je scure la buse di Pinçan, e ven la ploie, co e je clare al ven bon timp
• cuant che il cîl al è dut a lane, la ploie no je lontane
• cuant che il gjal al cjante la matine, la ploie e je vicine; cuant che al cjante la sere, bontimp si spere
• cuant che la lune e à il cercli, ploie sigure
• cuant che la matine a son trê sorei, ploie sigure
• cuant che la rane e cjante, ploie sigure
• cui che al è di sâl che nol ledi te ploie
• daspò dal bon timp e torne la ploie
• daspò dal seren a ven la ploie
• daspò de ploie al torne il bontimp
• e vâl plui une ploie te sô stagjon che no un tesaur buzaron
• il cîl al è dut a lane, la ploie no je lontane
• la ploie cuiete e travane la tiere
• la ploie di buinore a dure une ore
• la prime ploie di Avost a rinfrescje il bosc
• la prime ploie di Avrîl il cai al salte fûr dal so covîl
• montagnis claris, ploie vicine
• no je mai stade ploie che il bontimp nol sei tornât
• no si cjol la ombrene par une sole ploie
• no si fâs il tet par une sole ploie
• no stâ taiâ l'arbul che ti à parât de ploie
• nuie nûl, nuie ploie
• nûl a scjalins ploie a sglavins
• nûl a scjalins, ploie a cjadins; nûl a barcjons, ploie a bleons
• nûl a scjalins, ploie a sglavins; nûl a barcjons, ploie a bleons
• nûl in mont, ploie in cont
• nûl ros la matine, la ploie e je vicine; nûl ros la sere, bon timp si spere
• ploie che e sune a mene bon timp
• ploie di misdì, ploie dut il dì
• ploie in strade, tampieste in buteghe
• ros la sere, bon timp si spere; ros la matine, la ploie e je vicine
• salustri a la Basse, ploie in tasse
• se l'Ambrusêt al à cjapiel, ploie sigure
• soreli a mont tal sac, di ploie dut un slavuac
• soreli lusint: o ploie o vint
• sot de nêf pan, sot de ploie fam
• sot ploie fam, sot nêf pan
• tante poçale di Zenâr, tante ploie di Avrîl
• tantis rosadis di Març, tantis ploiis di Avrîl
• trê fumatis a fasin une ploie
• trê ploiis a fasin une montane