Dizionari de Lenghe Furlane

neri  /-é-/  ne|ri  [FO]

1. adi., s.m. colôr plui scûr di ducj, chel de mancjance complete di lûs:  une frute cun dôs lungjis strecis neris (Ivano Urli, Storie di Vera); une Guzzi Falcone dal '54: 500 cc, motôr a cuatri timps monocilindric, rosse e nere tant che il diaul (Antescûr, Il svol dal Falcone); une bree piturade di neri (Carlo Sgorlon, Ombris tal infinît)
2. adi., s.m. scûr par vie che al è in ombre o pe presince di robis che a fasin ombre o pe presince di elements scûrs:  il zûc des balis al jere neri di oms che a sberlavin (Alan Brusini, Par stradis lungjis); la citât e jere nere di int (Pieri Menis, Une letare par Bepo)
3. adi., s.m. une vore scûr, ancje se al pues jessi di fat une tonalitât di maron o di grîs:  Nardine invezit e varès puartade in dote dute chê biele tiere nere e grasse là jù sul ôr dal Cuar (Pieri Menis, Sul agâr); e rive la burascjade: nûi neris di ogni bande, vongulonis spropositadis che al pareve che a volessin gloti la nâf (Enrico Martina, Ricuarts e inlusions)
   Sin. scûr¹
   
   1. part nere o scure di alc:  la bandiere [di Udin] e je è un drap partît di neri e blanc, cul neri bande la aste (Aministrazion Publiche, Statût dal Comun di Udin)
4. adi. scûr, di prodots che a puedin jessi in plui varietâts di colôr:  medievâls a son lis primis atestazions dal Figo moro o Longhet, fîc neri tant preseât di Cjanive di Sacîl (Sandri Carrozzo, Une regjon di cerçâ); chê zoventût se gjoldeve tor une taule ben furnide di gracie di Diu, culà al fresc sot une piergule di ue nere (Zuan Lurinçon, La Madalene); moris blancjis e neris (Onorio Dose, I fruts di une volte)
   
   1. che al fâs prodots plui scûrs di colôr rispiet a altris de stesse sorte:  tal curtîl de famee di Jacum a Talmassons, dongje dal mussulin a jerin doi figârs grandiôs, un blanc e un neri (Angelo Covazzi, I fîcs)
5. adi., s.m. vin fat lassant la trape tal most intant de bulidure:  denant di lui al è 'Sef dut scalmanât che al bagne il bec cu la tace di neri (Dolfo Zorzut, La furlane); int che e beveve vin neri misturât cun gasose (Agnul di Spere, Un sorbet di limon)
6. adi., s.m. che, cui che al à la piel scure di nature:  vie i mucs e indenant chei altris: neris su la jeep, gome di mastiâ, sigarets americans, charleston e fox trot invezit di Lilì Marlene (Angelo Floramo, Cuintristorie dal Nûfcent 1940-1950); ta la mê imprese o ai scugnût cjapâ siet neris, parcè che no si cjatave nancje un blanc cun chê di tirâsi sù lis maniis da la cjamese (Fabian Ros, Eivissa mon amour)
   
   1. tipic des comunitâts di personis che a àn la piel scure di nature:  musiche nere
7. adi., s.m. deventât scûr cul soreli:  i oms vistûts di fieste ti àn lis mans e il cuel neris e a grops tant che lidrîs di morâr (Alan Brusini, Gian Paolo Linda, I forescj)
   Sin. scûr¹
8. adi. scurît par vie dal sporc:  i fruts ator dal fogolâr impiât o su lis bancjis dilunc i mûrs neris di cjalin (Pieri Menis, A uciei cu lis archetis); ongulis neris di morcje e un sotfont di odôr di vueli e di benzine che nol leve mai vie (Antescûr, Il svol dal Falcone)
   Sin. contôs , cragnôs , sporc
   
   1. s.m. sostance scure che e sporcje:  gjavâsi il neri des ongulis
9. adi. (fig.) caraterizât di pecjât, colpe, disonôr e v.i.:  al jere nome il pecjât dai oms che al rompeve la armonie dal mont, sgjarnant maglis neris tal araç infinît de creazion (Carlo Sgorlon, trad. Eddy Bortolussi, Marc di Europe)
   Sin. contôs , cragnôs , trist
10. adi. (fig.) che al à a ce fâ cun ativitâts ilegâls o iregolârs:  fonts neris; lavôr neri; marcjât neri
    
    1. s.m. jentrade no declarade:  fâ miârs di euros di neri
11. adi. (fig.) caraterizât di disgraciis, dificoltâts, depression e v.i.:  chê e je stade, par gno cont, la zornade plui nere di dute la anade (Josef Marchet, Lis predicjis dal muini); par dî il vêr, o ai passât un moment neri te mê vite. Ma ae fin o ai vût cheste fuarce, che e jere dentri di me, ancje se no le viodevi (Oscar Puntel, Un cjargnel al Concerton di Rome dal Prin di Mai: lis emozions di Doro Gjat)
    Sin. disfortunât , disgraciât
12. adi., s.m. (fig.) ancje in funz. av., in mût pessimist:  che si calmi, pal amôr di Diu, jê e viôt dut neri (Pieri Somede dai Marcs, Vilie di Nadâl (teatri))
    Sin. scûr¹
13. adi. tant che rinfuarcitîf di sostantîfs o adietîfs che a pandin un sens negatîf:  la plui part de nestre int ancje inscuelade e vîf te plui nere ignorance di dut ce che al è fûr dai confins de Penisule (Josef Marchet, Lôr no molin e nô no molìn); fruts che no vevin un fregul di colôr, dome chel de miserie e de fam, che e je nere (Antoni Beline, Pre Pitin)
14. adi. di brut umôr o une vore rabiât, ancje tant che rinfuarcitîf:  soldâts e uficiâi talians a jerin neris di murî dibant e di viodisi tratâts di cjans di Cadorna (Francesc Placerean, Cuintristorie dal Friûl dal 1866 fint in dì di vuê)
    Sin. rabiôs , invelegnât
15. adi. [TS] let. gjenar leterari cun carateristichis di misteri, di violence:  contis par no durmî (gjenar neri, gotic e di orôr) (Raffaele Serafini, Vagon Gnot e S(a)lam Poetry)
16. adi., s.m. polit. che, cui che al è di diestre estreme:  i sorestants a passin e il personâl al reste: simpri chel, cul re, cu la republiche, cui neris, cui ros, cui blancs, cui verts (Josef Marchet, Debil il cerviel ma fuarte la gramule); su la plaçute di Roncjâl al rivâ il «18 BL» cu la scuadrace nere (Dino Virgili, Devant di dut il cîl)
17. adi., s.m. [TS] zûcs intai zûcs de dame e dai scacs, toc scûr in oposizion a chei clârs:  la posizion di partence de regjine e je simpri te casele dal so colôr (la regjine nere te casele nere, la regjine blancje te casele blancje) (Nilde Teresa Negro, Zuìn di scacs)
    
    1. zuiadôr che al ten chei tocs:  vantaç une vore fuart dal neri (Nilde Teresa Negro, Zuìn di scacs)
18. adi., s.m. [TS] zûcs inte roulette, colôr di metât dai numars:  pontâ sul neri

Polirematichis e espressions idiomatichis

• a neri loc.av., loc.adi., loc.adi.inv.
• anime nere loc.s.f.
• bestie nere loc.s.f.
• borse nere loc.s.f.
• cafè neri loc.s.m.
• cjalâ di neri loc.v.
• dî blanc al blanc e neri al neri loc.v.
• lavôr neri loc.s.m.
• marcjât neri loc.s.m.
• meti neri su blanc loc.v.
• meti neri sul blanc loc.v.
• morâr di more nere loc.s.m.
• olnâr neri loc.s.m.
• vê la anime nere loc.v.
• viodi dut neri loc.v.
• viodi neri loc.v.
• viodi neri denant dai voi loc.v.
• viodi neri denant i voi loc.v.
• viodi neri devant dai voi loc.v.
• viodi neri devant i voi loc.v.
• zucar neri loc.s.m.

Proverbis:

• a scûr dutis lis ocjis a son neris
• a son i merlots che a restin neris, di cuant che a nassin fin cuant che a muerin
• di gnot dutis lis pioris a parin neris
• doi neris a fasin stâ ben la famee: predi e purcit
• i spaurôs a viodin il diaul plui neri di chel che al è
• il diaul nol è mai tant neri che lu fasin
• il diaul nol è mai tant neri che lu piturin
• la vacje nere e fâs il vidiel blanc
• lei libris vieris, bevi vin neri, lâ cun feminis che no son zovinis
• no bisugne fâ il diaul plui neri di ce che al è
• tiere nere a fâs bon pan, tiere blancje e fâs ledan
• tiere nere e fâs bon gran, farine blancje a fâs bon pan
• tiere nere e fâs bon gran, tiere blancje e fâs murî di fam