Dizionari de Lenghe Furlane

concet  /-èt/  con|cet  [FO]

1. s.m. rapresentazion mentâl articolade e ordenade, ben individuade rispiet a altris:  cuasi nuie di lui nol jentrave tal concet di "desiderabil": un pôc cracagnot, voi spirtaçâts e dôs mostacjutis furbitis che i fasevin la muse di un martar (Antescûr, Il svol dal Falcone); in sociolinguistiche il concet di "conflit linguistic" al descrîf une situazion di compresince di plui lenghis dulà che un ecuilibri che al garantìs la esistence di dutis lis lenghis al ven rot e un grup dominant al cîr di fâ sparî lis lenghis diviersis di chê sielzude tant che sô espression (Sandri Carrozzo, Vuere e pâs - Il conflit linguistic in Friûl jenfri vuere cidine e pâs bausarie); i paîs europeans a àn capît che il concet di sovranitât monetarie al è pe plui part ilusori stant che dut al dipendeve, in ultime analisi, de licuiditât fate cori tal sisteme internazionâl de Federal Reserve americane e de rispueste de Gjermanie (Patrizia Tiberi Vipraio, Euro o no euro: isal chest il probleme?); une onde, in fin dai fats, e je une pure astrazion, un concet matematic, intune sole peraule e ancjemò une volte une straordenarie e maraveose ilusion, l'insium o il pinsîr dal Jessi cosmic (Fabian Ros, Il lôf); no cate lis grandis scuviertis de fisiche moderne, il concet di timp al reste pe plui part discognossût (Franc Fari, Neurosiencis dal dolôr)
   Sin. idee , pinsîr , principi , prospetive , vision
   
   1. in gjenerâl, idee, pinsîr:  a Pieri che, tal ort dai ulîfs, al veve tentât la legjitime difese cu la spade, il Signôr, invezit di dâi la medaie di arint al valôr militâr, i comande di butâ vie la arme e di prometi di no doprâle plui. E par fâi capî miôr il concet, al ripare subit al mâl fat de difese, e i torne a tacâ la orele a Malco (Riedo Pup, Ligjeris, barabis e pacifiscj); il concet di fonde des storiis al è chel dal valôr de diversitât e de origjinalitât (Fabian Ros, Interviste cun Giorgio Cantoni)
      Sin. idee , pinsîr , principi
2. s.m. posizion intune scjale di valutazion:  par latin umber al jere un bastart di une cjavre e une piore, e al somee che chest apelatîf al stedi ae base dal non dai Umbri, vieri popul italic. O vês di savê di fat che chest nemâl al jere par antîc tignût in bon concet, par vie che i cuars a jerin simbul parie di vite che di muart (Barbara Cinausero, Un puest umit di lidrîs europeanis); o vevi simpri vût un concet tant alt de amicizie (Carlo Sgorlon, Il dolfin)
   Sin. impression , opinion , parê² , stime , judizi
   
   1. buine considerazion che si à devant di chei altris:  Fidrì no crodi za cun tôs finzions / di fâ pierdi il concet al to rivâl, / ne crodi di acuistâ cul tô dî mâl, / che il dî mâl al è propri dai c… (Ermes di Colorêt, II, 35); dopo dut chel concet che mi soi fat / cul mio Strolic Furlan del vincjecuatri (Pieri Çorut, Pronostic del 1827)
      Sin. innomine , non¹ , bon non
3. s.m. principi elementâr, cognossince di fonde di une sience, di une dissipline, di une tecniche, di une art:  par capî ce che al sucêt tal cîl, dispès al baste cognossi pôcs e sempliçs concets di base, un bon spirt di osservazion e un tic di intuizion fisiche (Stefano Micheletti, Marcellino Salvador, Notis di meteorologjie pal Friûl - Vignesie Julie)
   Sin. base , cognossince , fonde , pont , principi , nozion

Polirematichis e espressions idiomatichis

• vê in bon concet loc.v.
• vê in brut concet loc.v.