Dizionari de Lenghe Furlane

procès  pro|cès  [FO]

1. s.m. cjadene e svilup di fats leâts fra di lôr che a produsin il passaç di un stât a di un altri:  procès evolutîf; un program seri di intervents su lis cognossincis e sui ûs linguistics al rive a fermâ e a invertî i procès di sostituzion des lenghis (Xavier Lamuela, Une riflession su lis politichis linguistichis); la vitamine D e jude il cuarp a tirâ dentri il calci che al ven di ce che si mangje e cussì e jude il procès di cressite e consolidament dai vues (Guglielmo Pitzalis, Ocjo ai vues!)
   Sin. procediment , dinamiche
2. s.m. secuence di operazions fatis par rivâ un risultât:  il procès di inricjiment dal urani al è une vore complès e al domande tecnologjiis sofisticadis di separazion dai isotops (Alessandro Pascolini, Un mont cence armis nucleârs. Sfidis sientifichis e tecnologjichis)
   Sin. metodi , procedi , procediment
3. s.m. [TS] dir. complès di ativitâts e formis par rivâ ae soluzion di une controversie tra parts, cul judizi di un tierç imparziâl:  «Chestis a son lis spesis pai avocats e pal procès. Ca a son i contrats di vendite de cjase, dai cjavai, dal cjar, e di chei cuatri cjamps di nestri pari…» (Carlo Sgorlon, Prime di sere); i documents plui impuartants pal studi dai benandants a son propit chei stazâts di Ginzburg: lis cjartis dai procès de Incuisizion (Sandri Carrozzo, Jenfri vîfs e muarts)
   
   1. cjartis che a rivuardin un at jurisdizionâl:  lei il procès
4. s.m. [TS] filos. intal pinsîr neoplatonic, il moviment di emanazion de realtât dal principi, l'Un
   Sin. emanazion
   
   1. inte filosofie contemporanie, il davuelzisi, il divignî
5. s.m. [TS] inform. serie di operazions che a coventin par elaborâ dâts

Polirematichis e espressions idiomatichis

• mandâ sot procès loc.v.
• sot procès loc.av., loc.adi.inv.