Dizionari de Lenghe Furlane

cuel¹  /-è-/  cuel  [FO]

1. s.m. part dal cuarp che e tache il cjâf cul bust:  jê ti à un biel cuel scurut e une muse colôr dal piarsul za fat cuntun ros scuron a plen, i lavris come sopis di vin, i cjavei cjapâts tal cocon neris neris (Dolfo Zorzut, La furlane); Rita e veve ancjemò intor il vistît di fieste e ator dal cuel un fîl di perlis matis (Carlo Sgorlon, Prime di sere); al jere li, tal so jet, distirât cu lis cuviertis tiradis sù fin tal cuel (Roberto Ongaro, Cretevierte); sant Pieri, butadis lis bisacjis a cavalot dal cuel, si invià cul baston in man, viers il paîs dai Contents (Catarine Percude, Contents e malcontents)
2. s.m. canâl che al passe il mangjâ par lâ intal stomi e l'aiar par lâ intai polmons:  mi dûl intal cuel, no pues gloti (Laurin Zuan Nardin, Cui sêstu?); al veva seit, a i sbrissava il vin jù pal cuel tant co aga ta la gorna cuant che a montanea (Novella Cantarutti, "Sì che i vevi na marosa"); al veve fevelât di buride cul sangloç tal cuel (Pieri Menis, Sul agâr)
   Sin. gargat , gose , sgrasaiâr
   
   1. ancje in espressions che a pandin fuartis emozions:  Lise e sintive a bati il cûr tal cuel (Pieri Menis, La maghe no fale); di brut il cûr mi salte in cuel (Sandri Di Suald, Ah! la provincie); il respîr si çoncjà tal cuel (Maria Forte, L'avôt)
3. s.m. part di un vistiari che e sta intor dal cuel:  tal indoman Bruno, il capot cul pêl tal cuel e il cjapiel neri di panine, elegant come un milord, si presentà in Bancje (Carlo Sgorlon, Ombris tal infinît); intant mê agne Catine e à tacât a cusî cuei di cjamesis cu la sô machignute a man (Nadia Pauluzzo, Insumiâmi di Buie)
   Sin. dacuel , fassete , golet
   Cfr. golâr , golarine , bavar
   
   1. cjadene di aur o altri che si met tor dal cuel:  e vignì fûr un bocon di femine ben metude, cuntun biel cuel di cordon di aur (Catarine Percude, La fuiace de Madone)
      Sin. zîr
4. s.m. part dulà che il pît si articole cu la gjambe
   Sin. cuel dal pît , cjavile
5. s.m. part de scarpe che e sta intor dal cuel dal pît
6. s.m. part plui strente e slungjade di cualchi alc:  ogni tant a ficjavin in bocje il cuel di un fiasc e a trincavin un glutart che nol finive plui (Carlo Sgorlon, Prime di sere)

Polirematichis e espressions idiomatichis

• a rote di cuel loc.av., loc.adi.inv.
• a rotonon di cuel loc.av., loc.adi.inv.
• aghe al cuel loc.v.
• benedizion dal cuel loc.s.f.
• butâ i braçs al cuel loc.v.
• butâ i braçs ator il cuel loc.v.
• butâ i braçs intor dal cuel loc.v.
• butâ i braçs tor dal cuel loc.v.
• butâ lis brenis sul cuel loc.v.
• cjapâ pal cuel loc.v.
• cul cûr intal cuel loc.av.
• cul cûr tal cuel loc.av.
• dî tal cuel loc.v.
• fâ murî il flât intal cuel loc.v.
• grop dal cuel loc.s.m.
• grop intal cuel loc.s.m.
• grop tal cuel loc.s.m.
• lâ jù pal cuel loc.v.
• mâl di cuel loc.s.m.
• meti il pît sul cuel loc.v.
• miluç dal cuel loc.s.m.
• parâ i dincj jù pal cuel loc.v.
• parâ jù pal cuel loc.v.
• rompisi il cuel loc.v.
• saltâ tal cuel loc.v.
• sbati tal cuel loc.v.
• slungjâ il cuel loc.v.
• strece dal cuel loc.s.f.
• tignî il pît sul cuel loc.v.
• tirâ il cuel loc.v.
• vê il cjâf sul cuel loc.v.

Proverbis:

• cui che al à il cuel grues che nol mincjoni cui che al à la gose
• cui che al è usât a stâ picjât no i dûl il cuel
• cui che si maride pai bêçs si picje pal cuel
• Sant Blâs e sante blasiole che a preservin il cuel cun dute la gole