Dizionari de Lenghe Furlane

dêt  dêt  [FO]

1. s.m. ognidune des cinc estremitâts articoladis des mans e dai pîts dal om, o ognidune des estremitâts articoladis des çatis di ciertis bestiis:  Grivôr al veve componût un numar daûr chel altri, cun dêts simpri plui gnervôs (Franca Mainardis, Grivôr); Eliseo al ringracià e al saludà jevant sù il cjapiel cun doi dêts (Carlo Sgorlon, Prime di sere); si veve fat mâl taiant lens cu la see eletriche. Al veve pierdût doi dêts fasintsi ancje un biel tai su la palme de man (Amedeo Giacomini, Tal ospedâl)
   Sin. poleâr ipon. , macecrics ipon. , dêt grues ipon. , dêt grant ipon. , indiç ipon. , rufian ipon. , prin dêt ipon. , dêt di mieç ipon. , dêt di man ipon. , mace lungje ipon. , dêt dal anel ipon. , madulin ipon. , dêt piçul ipon. , mignul ipon. , mignulin ipon. , dindulin ipon. , dedulin ipon.
   Cfr. piç , ongule , aìne , man
   
   1. (par anton.) l'indiç, il dêt jenfri il poleâr e il dêt di mieç:  al passave cul dêt ogni non, par sigurâsi di no dismenteâ nuie (Maria Forte, Il Bide di Miot); Leida e mê mari nus disevin metint il dêt sui lavris: «Zito, fruts, che la Siore e sta pôc ben. No stait a cori, no stait a berlâ, vait a zuiâ te braide» (Alan Brusini, Come tai romançs)
   2. (par anton.) il dêt di mieç, jenfri l'indiç e il dêt dal anel, mostrât tant che ofese volgâr
   3. (par anton.) il dêt dal anel, chel jenfri il dêt di mieç e il dêt piçul:  al veve un anel tal dêt, un orloi di aur grant come une cevole, scarpis di vernîs, cjamese di sede (Pieri Menis, Une cotule pal dì de sagre)
2. s.m. part di une manece che e tapone un dêt de man:  vê une manece cuntun dêt sbusât
3. s.m. misure o cuantitât aprossimative che e corispuint plui o mancul a trop che al è grues un dêt:  cenant tune ostarie di Sant Martin, Barbure e bevè dome un dêt e e disè che e veve masse cjalt, e Laurinç la butilie se trincà dute lui (Agnul di Spere, Vivi a Codroip); cjar, cjar e cjar, cussì grasse che e faseve un dêt di cuince parsore dal brût (Maria Forte, "Nossent"); la buerate di sere e tacave a sivilâ dentri pes fressuris di dêt (Dino Virgili, La aghe da pît la cleve)
   
   1. piçule cuantitât:  chest fat, zontât cuntun dedut di zelosie, le puartave a cori jê sul puartel dal curtîl a spietâ la postine (Ivano Urli, La mance)
      Sin. piç , tic¹ , fregul , ninin , cic , ponte

Polirematichis e espressions idiomatichis

• a scote dêt loc.av., loc.adi.inv.
• dêt dal anel loc.s.m.
• dêt di mieç loc.s.m.
• dêt piçul loc.s.m.
• di lecâsi i dêts loc.adi.inv.
• meti il dêt su la gruse loc.v.
• meti il dêt su la plaie loc.v.
• meti la vere intal dêt loc.v.
• mostrâ a dêt loc.v.
• muardisi i dêts loc.v.
• paiâ un dêt di man loc.v.
• piçâ i dêts loc.
• segnâ a dêt loc.v.
• segnâ cul dêt loc.v.
• spiçâ i dêts loc.
• sù pai dêts loc.av.
• tignî come un dêt madûr loc.v.
• tignî il dêt tal cûl loc.v.
• tignî tant che un dêt madûr loc.v.
• tocjâ cul dêt loc.v.
• tocjâ il cîl cui dêts loc.v.
• tocjâ il cîl cul dêt loc.v.
• tocjâ il cîl cuntun dêt loc.v.
• tocjâ il paradîs cui dêts loc.v.

Proverbis:

• a mangjâ tocj cence polente, si scotisi i dêts
• cui che al mene il spêt nol tocje nancje un dêt
• cui che i da il dêt al mat, al vûl il dêt cun dut il braç
• ducj i dêts no son compagns
• i umign a son tant che i dêts des mans
• mai mangjâ i dêts par gole di cicin
• nancje i dêts no son ducj compagns
• no stâ mangjâti i dêts par voie di cjar
• o ai dîs dêts tes mans e se mi tai il plui piçul, mi dûl
• se tu ti tais un dêt, al jes sanc
• si urte simpri in chel dêt che si à mâl