Dizionari de Lenghe Furlane

restâ  res|tâ  [FO]

1. v.intr. fermâsi intun lûc o intune situazion o ativitât e v.i.:  jo o soi sul gno e culì o resti, se us comode (Luigi Gortani, Meni Fari); jo o resti a viodi dal fûc… Vait, vait, voaltris… (Dino Virgili, La aghe da pît la cleve); la matine a jerin restâts tal jet fin tart (Agnul di Spere, In viaç di domenie)
   Sin. fermâsi , intardâsi , stâ
2. v.intr. (fig.) di une notizie, di une vôs, di une confidence e v.i., no deventâ publiche, jessi cognossude dome di ciertis personis:  che e resti culì fra di nô: se a fossin oms scjampâts par no lâ in vuere, a àn fat benon a platâsi (Tarcisio Venuti, La cjase di Toni)
3. v.intr. jessi ancjemò, lâ indevant tal timp, spec. rispiet a alc altri che nol è plui:  daûr lis staipis di soreâl a jerin restâts stroputs di nêf che il soreli nol jere rivât a disfâ (Carlo Sgorlon, Prime di sere); se di gnot o vais su chei cuatri mûrs che a son restâts dal vecjo cjistiel, o sintîs a sdrondenâ chê cjadene sot tiere (Pieri Menis, Lis leiendis di Buie)
   Sin. condurâ , durâ , resisti , vanzâ
4. v.intr. jessi di fâ, tant che pussibilitât, oportunitât o necessitât:  ce restavial di fâ cumò? Cjapâsi sù e tornâ a cjase a pît (Alan Brusini, Par stradis lungjis); ai umign par chê anade no i restave che cjapâ sù il sac e là pal mont (Pieri Somede dai Marcs, La bissebove); e cun cheste… mi reste di visâus che doman o varìn messe e jespui cul solit orari (Josef Marchet, Lis predicjis dal muini)
5. v.intr. jessi ancjemò vîf:  muarts pari e mari, muarts i fradis, al jere restât dome un nevôt (Pieri Somede dai Marcs, Une butule verde)
   Sin. vivi
6. v.intr. lâ indevant a jessi intune cierte posizion, cundizion, situazion e v.i., spec. cuntun complement predicatîf:  o resti convint che la lenghe e la identitât furlane a sedin un element fondamentâl pe autonomie dal nestri teritori (Sandri Carrozzo, Autonomie e politiche linguistiche pal furlan); cuâl cûr di femine par dûr che al sei puedial restâ indiferent ae vôs di une frutine che e vai e e clame sô mari? (Pieri Somede dai Marcs, Timp di infier)
   Sin. stâ
7. v.intr. jentrâ intune cierte posizion, cundizion, situazion e v.i., par vie di une cause:  il fantat al jere restât incocalît di chê sorte di polegane (Roberto Ongaro, Il muc); a vot mês o soi restade vuarfine di pari, muart a vincjetrê agns (Cristina Noacco, Faliscjis)
8. v.intr. jessi in cunvigne, vê un acuardi:  cemût restìno par doman? Si viodìno a matine o dopomisdì?
   Sin. acuardâsi , conciertâsi , convignî , justâsi , patuî , metisi dacuardi
9. v.intr. jessi ancjemò, rispiet a alc che si à za dit, considerât, fat, vendût, mangjât e v.i.:  Dreute al scugnì vendi chel tic che i restave par comprâsi un biliet pal Venezuela (Alan Brusini, Alpin jo mame!); tancj cjamps a jerin stâts vendûts vie pai agns, ma a jerin restâts, di istès i prâts vierts dal Lavio pal fen di une vacje e lis vîts gropolosis dal Costeon, e ancje i cjamps dal Abìs e dal Nasoç (Maria Forte, Cjase di Dalban)
   Sin. mancjâ , vanzâ
10. v.intr. jessi cjapât di maravee, delusion o sim.:  Nadalin al va jù pe braide […] E al cjate il copari Min che al lave di une cumiere in chê altre a robâi panolis, cul sac. Lu spiete sul cjaveç, da pît, e i dîs: «Orpo, copari, o resti…» (Meni Ucel, Mangjativis); chei fantats a jerin restâts, a viodi chê gjenerositât (Cristina Noacco, Faliscjis)
11. v.intr. tocjâ, lâ in proprietât o in competence, spec. di alc che al ven lassât:  sô pari i veve lassât une cjase, une vacje e cuatri cjamputs che a jerin restâts ducj a lui parcè che i siei fradis a jerin muarts di spagnole in timp dai mucs (Pieri Somede dai Marcs, Nadâl); ancje siore Lise e pensave ae robe che e sarès restade ai siei fîs (Maria Forte, Cjase di Dalban)
    Sin. lâ , vignî
12. v.intr. jessi situât, vê une cierte posizion rispiet a un percors o a cdn. o a alc:  [Bastian al leve indevant cul cjar] Sant Denêl al restà a man çampe (Maria Forte, L'avôt); cjalant de bande dal mâr, lis vignis di Rivesaltes ti restin daûr de spale çampe (Agnul di Spere, Il puint de ledre)
    Sin. jessi¹ , stâ
13. v.intr. jessi a durmî o a vivi:  a cjase nol podeve restâ, che a pene che i fassiscj o i todesc a vessin savût che al jere tornât […] a saressin vignûts dal moment a cjolilu (Roberto Ongaro, Il muc)
14. v.intr. pierdi la vite:  gno cusin Rolando al tornà ad ôr cul sanc che i spissulave dal cjâf (robis di restâ alì) (Lucio Perès, Tal Cuar)
    Sin. murî , restâ sec
15. v.intr. cessâ o stratignîsi di fâ alc, fâ di mancul di fâ alc:  tu viôts, nissun al reste / di riceviti in gale e fâti fieste (Pieri Corvat, Ae Primevere dal 1895)
    Sin. finî , molâ , cessâ , smeti , lassâ

Polirematichis e espressions idiomatichis

• a bote e reste loc.av., loc.adi.inv.
• a plombe e reste loc.av., loc.adi.inv.
• restâ a bocje sute loc.v.
• restâ cence flât loc.v.
• restâ cence peraulis loc.v.
• restâ cui dincj in bocje loc.v.
• restâ cul nâs gotant loc.v.
• restâ cun tant di nâs loc.v.
• restâ di clap loc.v.
• restâ di peçot loc.v.
• restâ di piere loc.v.
• restâ di plomp loc.v.
• restâ di stuc loc.v.
• restâ dûr loc.v.
• restâ fûr loc.v.
• restâ in blanc loc.v.
• restâ in cjamese loc.v.
• restâ indaûr loc.v.
• restâ mâl loc.v.
• restâ par tiere loc.v.
• restâ sot i fiers loc.v.
• restâ su la cjarte loc.v.
• restâ sui braçs loc.v.
• restâ sul stomi loc.v.
• restâ tes orelis loc.v.

Proverbis:

• a fâi ben al om ingrât, si reste bec e bastonât
• a litigâ, un al reste in cjamese e chel altri biel nût
• a messedâsi tal cjarbon, si reste cjarbonâts
• a son i merlots che a restin neris, di cuant che a nassin fin cuant che a muerin
• a tratâ cui gjats si reste sgrifignâts
• a volê gjavâ i clauts cui dincj si reste sdenteâts
• aghe peste, aghe e reste
• al è muart il paron: aial di restâ il famei?
• bisugne mangjâ tant vuê che ind' resti ancje par doman
• che e ledi la plume pûr che al resti l'uciel
• cjastie la cjice par che il cjan al resti a cjase
• cui che al gaspare al reste gasparât
• cui che al mincjone al reste mincjonât
• cui che al reste daûr che al sieri la puarte
• cui che al rît al reste ridût
• cui che al va dongje dai mulinârs al reste infarinât
• cui che i fâs ben al om ingrât al reste bec e bastonât
• cui che le vuadagne al reste in cjamese, cui che le piert al reste nût
• cui che pal trop al piert il pôc al reste cuntun pugn di moscjis
• cui che si distire plui infûr de plete al reste cui pîts distaponâts
• cui che si ustine cul mangjâ al reste bausâr
• cul messedâ l'ont a restin lis mans onzudis
• di une cjase brusade a restin almancul i clauts e la cinise
• dulà che al è stât il fûc al reste odôr di brusadiç
• dulà che al è stât il fûc e reste la cinise
• dulà che si stravuelç il mus al reste il pêl
• dulà che si tombole il mus al reste il pêl
• e va tant la sele al poç, fin che e reste dentri
• la falsetât e à il tabâr curt, par tant che e ciri di taponâsi, i reste simpri cualchi part scuvierte
• la peraule e svole, la cjarte e reste
• mâl par cui che al va, piês par cui che al reste
• ni par bondance ni par cjaristie no reste la cjar in becjarie che il cjan o il gjat le puartin vie
• plui ind mûr e mancul ind reste
• se il draç nol ten aghe, al reste bagnât
• tant al va il cjaldîr tal poç che infin al reste