Dizionari de Lenghe Furlane

sfreolâ  sfre|o|lâ  [CO]

1. v.tr. tocjâ o passâ, cun plui o mancul pression, cuntun moviment lunc, ancje ripetût:  jo lu cjali di sot vie e lu viôt che al sfreole cu la manie il voli dret, mi pâr che al ves vût di vaiussâ (Dolfo Zorzut, No je plui vive); [la cjandele] binidide la dì di sant Valantin, / che baste sfreolâle sul cuel di un frutin / par che al vuarissi biel biel / sence miedi ne midisine / di chel brut mâl che al è il mâl tal cuel (Zuan Lurinçon, Il jet antîc di famee); lis scarpis di corean a pararan gnovis se prin di lustralis tu lis sfreolarâs cuntune pieçute imbombade tal spirit ()
   Sin. russâ , passâ , freâ , sfreâ , freolâ
   Var. freiâ
   
   1. tocjâ la piel o fâ pression sui muscui in maniere di scjaldâ, tonificâ e v.i.:  o spessei a sfreolâi il nâs, sfreole che ti sfreole alì su la strade il nâs conzelât di chest om (Ivano Urli, Storie di Vera); a scugnivin sfreolâlis [lis mans] par sclipîsi (Antoni Beline, La fabriche dai predis)
      Sin. massazâ
2. v.tr. (fig.) tratâ in mût di complasê:  sfreolâ l'amôr propi dal francês (Arturo Feruglio, I stivâi di Zuan Batiste)
   Sin. freolâ , lusingâ , lenzi
3. v.tr. (fig., pop.) imbroiâ o meti intune situazion negative, procurâ dam:  nol è che a Stiefin i plasi cui sa ce chel lavôr. In fin dai fats si trate di sfreolâ la int, massime chê plui biade. Ma ancje lui al à di vivi (Gianluca Franco, I triscj)
   Sin. fâ sù , inculâ , infenoglâ , buzarâ , strabuzarâ , taconâ , foti , freolâ , freâ
4. v.tr. (fig., pop.) puartâ vie, robâ
   Sin. gratâ , foti , robâ , inculâ , taconâ , freolâ , freâ
5. v.tr. ridusi in tocs, in fruçons:  la grape e sfreole lis çopis di tiere nere (Giuliana Miculan, Cuadrut di Fevrâr)

Proverbis:

• a sfreolâ mulets, si vanze scalçs e pêts