Dizionari de Lenghe Furlane

piturâ  pi|tu|râ  [FO]

1. v.tr. rapresentâ formis e figuris cui colôrs:  [il pitôr] al veva da piturâ na Madona par na glesia poada in cima la mont (Novella Cantarutti, Scûr e lusour); sui mûrs, cuntun stamp a vevin piturade la sesule e il martiel cul colôr ros (Alan Brusini, Par stradis lungjis)
   Sin. penzi , tirâ jù , dipenzi
   Cfr. impintî
2. v.tr. ass., praticâ la art de piture:  la int lu amirave par chel so mistîr di artist; lui al piturave e al vendeve (Roberto Ongaro, Cretevierte)
   Sin. impintî , penzi , dipenzi
3. v.tr. decorâ cun pituris:  un artist di prime sfere, chel che al à piturade la capele dal Domo (Costantino Smaniotto, Co l'amôr al cimie)
   Sin. penzi , impintî , dipenzi
4. v.tr. dâ sù colôr o vernîs o sim.:  Eliseo le puartà a cjase [une biciclete vecje], e dopo gratade cu la cjarte di veri le piturà miôr che al podè (Carlo Sgorlon, Prime di sere); al veve tacât a piturâ i scûrs: a 'nd tirave jù un par volte, lu gratave e lu slissotave cu la cjarte di veri e i dave sù il vueli di lin (Roberto Ongaro, Cretevierte); che al dedi fûc a dute la marcjanzie e po che al pituri cu la creoline il cjar se al vûl salvâsi [dai pulçs] (Angelo Covazzi, I pulçs)
   Sin. dipenzi , impintî , incolorî , intenzi , invernisâ , penzi , pinelâ , tenzi
5. v.tr. (fam.) meti sbelet o altris cosmetics:  piturâ i lavris cul sbelet
   
   1. fâ che i cjavei a vedin un ciert colôr, doprant cosmetics:  i siei cjavei a jerin neris, stant che ju piturave (Carlo Sgorlon, Il dolfin)
      Sin. tenzi
6. v.tr. (fig.) descrivi:  o scugnìn dî che nô o sin ce che o sin. Nô no sin chel popul eroic che nus àn piturâts sui gjornâi cuissà parcè. O sin un popul come tancj altris (Francesc Placerean, Nadâl nus fâs capî che la storie e je plui profonde e biele di chel che e somee); te memorialistiche di chei agns, scrite pe plui part di Strumîrs, i rivoltôs a vegnin piturâts tant che pipinots intes mans dal Savorgnan (Carli Pup, Il Friûl de Joibe Grasse dal 1511); Rico al veve une teolighe che ti piturave lis robis che tu scugnivis zurâ che a jerin veris (Riedo Pup, Il compromesso)
   Sin. descrivi , presentâ
7. v.tr. (fig.) fâ che alc al cjapi un ciert colôr o un ciert aspiet:  al tacà a soflâ e a vosâ un tramontan frêt, che in pôc timp al netà vie i nûi e al rivà a piturâ di ros il cîl de bande di soreli a mont (Carlo Sgorlon, Ombris tal infinît)
   Sin. penzi , impenzi , dipenzi , tenzi , intenzi

Proverbis:

• cui che al fâs fabricâ al à bêçs in casse, cui che al fâs piturâ ind à di masse
• fabricâ cui bêçs in casse, piturâ se a 'nd è masse
• il diaul nol è mai tant brut che lu piturin
• il diaul nol è mai tant neri che lu piturin