Dizionari de Lenghe Furlane

music¹  /-ìc/  mu|sic  [AF]

1. s.m. des bestiis, part denant dal cjâf, li che e je la bocje:  [il gjat] al jeve sù, al sgurle la schene e al svicine il musicut ai smursiei de frute (Carlo Tolazzi, La salamandrie tal fûc); la frute si jere imboreçade e e meteve lis manutis sul veri par cjapâlu e il pes, spaurît, al cirive di scjampâ e al bateve il music tal dûr (Maria Forte, La tiere di Lansing); il cjan, strissinant il music par tiere e la code jenfri lis gjambis, al va dongje di chel che lu clame (Pieri Menis, Destins)
   Var. mustic
   
   1. (scherç., iron., spres.) muse di persone:  un armâr di pastelis, di farinis, di aghis di bonodôr par pistrignâsi il music (Josef Marchet, Lis predicjis dal muini)
2. s.m. (fig.) espression di malumôr, di risintiment:  cualchi volte un tic di music, un fregul di burascje. No si saveve nancje parcè (Pieri Piçul, Vieri e gnûf)
3. s.m. part devant di un ogjet:  il Shell al acelere un bocon di strade inlà e po al bloche a fer cul music dal camion a un metri de rie dai frutats (Dino Virgili, La strade come un destin); Anglia Ford 1960… cun chel music… a ûs une balene, une forme acuatiche, un barracuda cui doi grancj fanâi tant che voi (Checo Tam, Anglia Ford 1960)
   Sin. denant

Polirematichis e espressions idiomatichis

• fâ il music loc.v.
• plantâ il music loc.v.