Dizionari de Lenghe Furlane

parâ indaûr    [CO]

1. loc.v. fâ lâ indaûr, soredut cun determinazion o ancje cun fuarce:  [Luduì di Teck] al comparì in Friûl cun cualchi miâr di mercenaris ongjarês, cjapant Manzan, Rosacis, Scluse e rivant fin sot Udin. Ma i mercenaris di Tadiu di Este e dal cont di Carmagnole lu pararin indaûr (Josef Marchet, Cuintristorie dal Friûl fin sot la Italie)
   Sin. butâ indaûr , mandâ indaûr
2. loc.v. in riferiment a une sensazion, a une maniere di fâ, a une volontât e v.i., no lassâ che e vedi efiet:  il vecjo, scuasit che si ingropave, ma al voleve parâ indaûr chel stupit moto dal cûr (Maria Forte, La tiere di Lansing)
3. loc.v. refudâ, no acetâ, no cjapâ par bon:  al spessee a parâ indaûr la propueste (Franco Marchetta, Madalene)
   Sin. butâ indaûr , refudâ , mandâ indaûr
4. loc.v. no da bon acet a cdn., fâlu sintî malvolût:  nissun veve voi che a stazavin a svelt e a paravin indaûr, come la agne Baldasse (Maria Forte, Cjase di Dalban)

Components:

• indaûr av., inter., adi.inv.
• parâ v.tr.