Dizionari de Lenghe Furlane

stâ indaûr    [CO]

1. loc.v. intun moviment, intun ordin, intune disposizion, intune secuence e v.i., jessi o restâ de bande contrarie al denant:  siôr Zaneto l'à dât l'incaric ai siei doi fîs plui grancj, e a pre Checo mestri di cjase di lâju a compagnâ [i invidâts], intant che lui al sta indaûr a spietâ i predis (Giovanni Gortani, A la sagre di Mion); al veve decidût di fâ il sunadôr: di liron, par altri, par stâ indaûr, platât di ducj (Gianni Gregoricchio, Pollione Magrini)
2. loc.v. restâ lontan di alc o di cdn.:  a ce fâ vignîso chenti / freolantsi par chei mûrs? / Se vignîs par cambiâ l'aiar, / jo us consei di stâ indaûr (Popolâr, A ce fâ vignîso chenti)
   Sin. tignîsi indaûr
3. loc.v. fâ mancul di altris, jessi mancul di altris:  "Aie sintût ce batule?" "Dal rest, nancje tu no tu stâs indaûr, mi pâr" (Ercole Carletti, Mariute); "[…] il guvier al à dopleade la tasse su lis butiliis." "E i comerciants chei ludros par no jessi di mancul a àn cressût il presit trê voltis tant par no stâ indaûr." (Pieri Somede dai Marcs, Un pugn di moscjis)
   Sin. tignîsi indaûr

Components:

• indaûr av., inter., adi.inv.
• stâ v.intr.