Dizionari de Lenghe Furlane

soflâ  so|flâ  [AF]

1. v.tr., v.intr. mandâ fûr de bocje o dal nâs aiar o ancje fum o altri:  sul prât il piorâr al soflave tun sivilot fat di scusse di morâr (Pieri Somede dai Marcs, Clâr e scûr); al impià un spagnolet e al soflà in alt il fum (Dino Virgili, La aghe da pît la cleve)
   
   1. dai gjats e di altris animâi, mandâ fûr aiar a fuart tant che segnâl di agressivitât:  un bastardut i nase i sghirets, la gjate i sofle e si rimpine vie (Raffaele Serafini, Melie la buine)
   2. espirâ cun fuarce, soredut pe fadie:  cumò si jere poiât cuintri dal arbul e al soflave, come che al ves fate une corse di rive sù (Gianni Gregoricchio, Îr e doman)
      Sin. sfladâ
   3. espirâ fuart dal nâs, spec. tun façolet, par mandâ fûr il snacai:  de sachete slambrade i saltave fûr il pic di un grant façolet ros a boi blancs e neris che al jere simpri a puartade di man par soflâ chel nâs tabacon (Pieri Somede dai Marcs, Il gno prin mestri)
      Sin. sgnofrâ
2. v.intr., v.tr. produsi un flus di aiar, ancje no cu la bocje:  svelte la parone sofle cul soflet ta boris, met sul cjavedâl in strucjel une fassine e un dôs grampadis di scjelis (Dolfo Zorzut, Ipocrisie, ipocrisie, el Signôr ti cjastie)
3. v.tr. (fig.) indusi cdn. a fâ alc, a impegnâsi, soredut cuintri di cdn. altri:  al jere di secui incà che i Madiis a soflavin, a stiçavin sot vie [cuintri dai Batistons] (Dino Virgili, La aghe da pît la cleve); no olevi dâi il gust a chei cuatri socios di ridimi daûr e magari, cul capelan che ju soflave parsot, tornâ a dâ l'assalt al cumun (Pieri Somede dai Marcs, Lis scuelis e la nêf)
   Sin. stiçâ , saborâ , meti sù
4. v.intr., v.tr. (pop.) in espressions che a pandin disinterès, dispresi, fastidi, rispueste negative o sim.:  "Eh, cjârs voaltris, soflaitmi!…" al rispuint Sant Martin tornant a metisi in viaç (Luigi Gortani, Sant Martin)
5. v.tr. dî sot vôs o jenfri i dincj:  si sinte, al scomence a cjalâle tai voi e po i sofle tes orelis: "A ogni fadie el so compens, Beltramine benedete…" (Arturo Feruglio, El cercandul); "Benedet di frut, culì tu sês colât su lis boris" i veve soflât sot vôs (Maria Forte, Dome la cjampanute di Sant Bortul)
   
   1. dî o sugjerî di scuindon
6. v.intr. dal aiar, movisi, passâ cun plui o mancul fuarce:  il maistri intant veva cessât di soflâ; e zirant par buerin, veva jevât una levantera, che si faseva infuriada (Federigo Comelli, Il me paîs); fûr e soflave une buere che e glaçave ancje il sanc (Pieri Menis, Il «miracul» di un ûf)
   Sin. spirâ , svintâ , svintulâ , bugâ , menâ , tirâ
   
   1. (fig.) movisi, spandisi o jessi puartât tal aiar:  E tu Vergjin Beada? Sint se bon odour che al sofla dal nustri paîs… Odour di fen e di erbis bagnadis, odour di fogolârs, odour che i sintivi di fantassin tornant dal cjamp (Pier Paolo Pasolini, I Turcs tal Friûl)
7. v.tr. zûcs inte dame, puartâ vie la pedine al aversari se nol à mangjât cuant che al podeve
   
   1. (fig.) cjapâ, puartâ vie alc a cdn. cuintri de sô volontât o cuintri di ce che al sarès just:  e intant la Inghiltere si cjape Sipro, si poe in Egjit e se la intint cu la France che nus sofle sot il nâs la Tunisie… (Dino Virgili, La aghe da pît la cleve); gno fradi Panzete i veve soflât la morose (Meni Ucel, Ideis)

Polirematichis e espressions idiomatichis

• soflâ il nâs loc.v.
• soflâ tal fûc loc.v.

Proverbis:

• cui che al è scotât te meste al sofle te batude
• cui che al sofle te cinise si jemple i voi
• cui che i dûl che si sofli