Dizionari de Lenghe Furlane

meti di bande    [AF]

1. loc.v. meti alc o fâ lâ cdn. un pôc lontan, in gjenar in direzion laterâl:  mê mari, mitût di bande il zei di cusî […] e butà une grampe di stecs e manei sul fogolarut (Pieri Somede dai Marcs, Il tinel)
   Sin. meti de bande , meti in bande , lassâ di bande , lassâ de bande , lassâ in bande , poiâ in bande , poiâ di bande , poiâ de bande
2. loc.v. tignî alc a disposizion par se stes o par altris, par podêlu vê o doprâ cuant che al covente:  jo o vevi tal cjâf di fâmi chel fregul di cjase, e an par an ju metevi di bande ducj [i bêçs], un parsore l'altri, fintremai che o' nd ai vûts avonde par comprâ il fonts e tirâ sù chel lûc che o soi a stâ ancjemò (Josef Marchet, Lis predicjis dal muini); nol veve cenât: la polente e il frico che i vevin metût di bande si disfredavin, il lidric si flapive (Dino Virgili, La aghe da pît la cleve)
   Sin. meti vie , tignî cont , tignî di bande , dâ dongje , meti dongje , meti in bande , meti de bande
3. loc.v. lassâ stâ, in maniere provisorie o definitive, un progjet, une ativitât, une maniere di fâ e v.i.:  i goloseçs e àn fat meti di bande al predi la famose parsimonie de magnocule (Arturo Feruglio, Viaç a Vignesie)
   Sin. meti de bande , lassâ di bande , lassâ de bande , lassâ in bande , butâ di bande , butâ de bande , butâ in bande , parâ in bande , parâ di bande , parâ de bande
4. loc.v. fâ che cdn. al vedi di molâ une posizion, une ativitât, une funzion e v.i.:  [i sorestants] a jerin vignûts sù te clime litorie e cumò a son stâts metûts di bande (Josef Marchet, Fûr cui che i tocje)
   Sin. meti de bande , lassâ di bande , lassâ de bande , lassâ in bande , butâ di bande , butâ de bande , butâ in bande , parâ in bande , parâ di bande , parâ de bande
   
   1. fâ stâ cdn. intune posizion di pocje impuartance o di nissune impuartance, no calcolâlu:  ce che, invezit, o ai clâr iniment, al è il gno sintîmi metude di bande. Mi visi che i jeri lade incuintri a gno pari, ma di lui o vevi vude dome une cjarinade in premure (Gianni Gregoricchio, Trê feminis)

Components:

• bande s.f., prep.
• meti v.tr.