Dizionari de Lenghe Furlane

meti lis mans    [CO]

1. loc.v. tocjâ:  Marilde e jere bielote e za esperte di oms, cuntun par di agns plui di lui, che i meteve lis mans pardut e che si maraveave di cjatâlu cussì timit (Alan Brusini, Par stradis lungjis)
2. loc.v. rivâ a cjapâ, a vê:  rivant chenti, la republiche di Vignesie e meteve lis mans suntune Regjon dal dut diferente (Josef Marchet, Cuintristorie dal Friûl fin sot la Italie); i siei fradis a vevin metudis lis mans su dut il patrimoni, come se lui al fos bielzà lât in chel altri mont (Carlo Sgorlon, Ombris tal infinît)
3. loc.v. intervignî, fâ alc, soredut par comedâ:  Lissandri nol rivave a pensâ a altri che a chê puare femine, bessole a frontâ une disgracie cussì grande; forsit no saveve nancje indulà meti lis mans, no saveve cemût voltâsi in chê circostance (Franca Mainardis, Il sium di Lissandri); se o confrontìn chestis ideis cun chês di Windows si viôt la diference: li e je dome une version, chê de Microsoft, e dome lôr a puedin meti lis mans, parcè che il codiç daûr nol è public (Andrea Decorte, Linux: libars di... digjitâ)
   Sin. meti man

Components:

• man s.f.
• meti v.tr.