Dizionari de Lenghe Furlane

dâ reson    [AF]

1. loc.v. acetâ, ameti, ricognossi che cdn. al fâs ben a compuartâsi intune cierte maniere o a fevelâ o a resonâ intune cierte maniere:  "Se nol è plui nuie ce fâ, cun chê sorte di fie malnassude, miôr distrigâle… E daurman ancje, …par no strissinâ a lunc la rabie", e diseve siore Anute a siôr Agnul. Lui i dave reson (Maria Forte, Cjase di Dalban); la mari e taseve e, ogni tant, e niçave il cjâf, no savint a cui dai doi dâ reson (Roberto Ongaro, Il muc); "[…] cumò sta scoltâmi biel, dopo o vedarìn se no tu mi darâs reson" (Jolanda Mazzon, Di là de rêt)
   
   1. dimostrâ che cdn. al è tal just:  "Us dîs che cun doi gjai tun gjalinâr no si po lâ ben!" La storie, plui indenant, i varès dât reson (Roberto Ongaro, Cretevierte)
2. loc.v. dî une justificazion, un motîf, une cause:  dôs peraulis di coment aes leturis che o vin fat, prin di dâ reson di cheste Messe di usgnot (Francesc Placerean, L'ultin patriarcje: Denêl Dolfin); a chest pont al reste di dâ reson dal passaç fonetic di fricò a frico, che si à di datâ dopo de metât dal Votcent, viodût che tal 1846 e tal 1856 Toni Broili al dopre ancjemò fricò (Sandri Carrozzo, Frico un plat furlan cuntun non di origjin foreste)

Components:

• dâ v.tr., v.intr.
• reson s.f.