Dizionari de Lenghe Furlane

sfuarçâ  sfuar|çâ  [AF]

1. v.tr. obleâ cdn. a fâ alc:  lu cjapà par un braç par sfuarçâlu a tornâ dentri. «Ven, ven cun nô a bevi un got» (Maria Forte, La tiere di Lansing); i insegnants a sfuarçavin i gjenitôrs a no fevelâ par furlan ai fruts, cu la false justificazion che no varessin imparât ben la lenghe uficiâl (Sandri Carrozzo, Un paîs furlan in Argjentine: Colonia Caroya)
   Sin. obleâ , pleâ
2. v.tr. impegnâ une vore di fuarce o plui fuarce dal normâl par otignî un risultât, par indusi alc a dâ un risultât cuintri di une resistence o di une inerzie:  un grup di maris e paris talians che a volevin che i lôr fîs a savessin ben il todesc […] a àn sfuarçât il sisteme de scuele materne taliane par fâ jentrâ ogni dì une ore di todesc (Franc Fari, Il cjâf dai furlans)
   
   1. ancje cun elements imateriâi, puartâ a un risultât o a une consecuence che e je di là di ce che al sarès naturâl, logjic, provât e v.i.:  la none cumò no ju scjaldave cun nissune idee, che a sfuarçâ lis robis si lis ruvine (Maria Forte, Cjase di Dalban); al sarès dibant sfuarçâ la storie par tignî leât il Friûl cul mont talian dal X al XIII secul (Josef Marchet, Cuintristorie dal Friûl fin sot la Italie)
3. v.tr. indusi a une cressite o a une produzion plui svelte e plui bondante di ce che al è naturâl o normâl:  no conven sfuarçâ lis plantis cun masse ledan (Giulio Andrea Pirona, Ercole Carletti, Giovanni Battista Corgnali, Il Nuovo Pirona); si à di meti a produzion / ogni blec, ogni cjanton, / e sfuarçâ la agricolture, / fâ al teren mudâ nature. / Contadins, finìs culì, / no mi reste altri ce dî; / e vês il Contadinel / e podès consultâ chel (Pieri Çorut, Pronostic del Strolic piçul par l'an 1857)
4. v.tr. vierzi alc cu la fuarce, ancje fasint un dam:  soi rivât sul scurî, il paîs mieç brusât, cuasi nissun pe strade, la puarte di cjase sierade… o bat, o sfuarci la puarte… nissun! (Pieri Somede dai Marcs, L'ombrenâr); i àn sfuarçât la puarta, / i àn parât jù i armarons / e al comodin. / Jo ju spetave, platât / sot al liet. / "AH, DIU! / I SON RIVÂTS / I UMANS!" (Federico Tavan, La nâf spaziâl)
   
   1. pressâ, sburtâ, fracâ cun plui fuarce di ce che al covente, ancje fasint un dam
5. v.tr. fâ alc in maniere no spontanie, no naturâl:  al sfuarçà une ridade di zenziis scoloridis (Maria Forte, Il tei)
   
   1. v.intr. sucedi, vignî fûr e v.i. in maniere no spontanie, no naturâl, no armoniche:  lis notis a àn di sei butadis fûr pulidis, il lavri tirât sul bochin, il strument tignût dret, ordin tal respîr, e alore i semitons no sfuarcin (Alan Brusini, Amîs come prime)
6. v.tr. [BF] fâ violence sessuâl
   Sin. violentâ
   Cfr. doprâ

Proverbis:

• no si po sfuarçâ lis cjartis