Dizionari de Lenghe Furlane

frêt  frêt  [FO]

1. adi., s.m. che al è a temperadure basse o plui basse di chê ambientâl o dal cuarp, che al prodûs une sensazion contrarie a chê dal cjalt:  une fontanute di cise cu la aghe frede e cjantarine (Dino Virgili, La aghe da pît la cleve); une fumate grise, frede, sirocâl e infagotave i pins alts e neris (Pieri Somede dai Marcs, I "resti")
   Sin. dûr , glaçât , inglaçât , crût
   Var. freit
   
   1. s.m. temperadure basse, che e da sensazion contrarie al cjalt:  «Il frêt», nus diseve, «baste volê no sintîlu, e nol è» (Meni Ucel, Messe a straoris); ta chê stazion al jere frêt, e vignive sù une sorte di buere dal lât di Zug (Agnul di Spere, In viaç di domenie)
      Sin. crût , criùre , zime¹ ipon.
2. adi. di robe di mangjâ o di bevi, che e à une temperadure basse, par vie che si use a mangjâle o bevile cussì:  - Elementâr - dissal Begot e cussì disint al ordenâ un cafè frêt (Fabian Ros, La rambe); par cene, dome un plat frêt. O vevin mangjât masse a gustâ (Gianni Gregoricchio, Trê feminis)
   
   1. di robe di mangjâ o di bevi, che no je plui avonde cjalde:  une pastesute flape, tacadice tant che la cole e cuinçade cuntun ragù frêt e agadiç (Alan Brusini, Gian Paolo Linda, I forescj); no ti âs mangjât nuia; e la polenta a è freida. Cor a mangjâ, e dopo zin subit in Glisia (Pier Paolo Pasolini, I Turcs tal Friûl)
3. adi. spec. tal lengaç sportîf, di muscul o di atlete, no ancjemò scjaldât, no ancjemò pront di sopuartâ un sfuarç:  fasêt riscjaldament, no si pues fâ i esercizis cui muscui frêts
4. adi. che al à il cuarp che nol è plui cjalt par vie che al è muart:  cussì vuê le vin cjatade frede, che la aghe le sbateve cuintri i sclusets. E doman le butaran sot, sine luce e sine cruce, parcè che la Glesie no po aprovâ cui che al si cjol la vite di bessôl (Josef Marchet, Lis predicjis dal muini); che lu coionavin o lu tiravin a ciment, ur coreve daûr e ur petave di lassâju frêts (Antoni Beline, Pre Pitin)
5. adi. (fig.) cence partecipazion emozionâl, cence passion:  par solit lui al veve un mût di fâ frêt e smavît, e plui di dut pierdût intune ironie pinsirose (Carlo Sgorlon, Il dolfin); un om plen di principis e di teoriis e frêt come il nâs dal cjan (Antoni Beline, Pre Pitin)
   Sin. di glace , distacât , dûr , glaçât , impassibil , ruspi , sec , sut , impersonâl , smamît , smuart , sterp²
   
   1. s.m. mancjance di calôr uman:  forsit par fâi provâ ai forescj il frêt dal vueit? E par difindi ce? La lôr miserie? (Alan Brusini, Gian Paolo Linda, I forescj); dome alore, jê e veve misurât tal frêt di chês peraulis il so displasê (Maria Forte, Cjase di Dalban)
6. adi. di colôr o tonalitât che al parten ae gradazion dal vert o dal blu:  la linie di stîl dal gnûf sît […] e je frescje e nete, su lis tonalitâts fredis dal blu cun detais zâi par riclamâ la bandiere furlane (Michele Calligaris, Il gnûf e-fogolâr dal Istitût Tellini)
   
   1. che, ancje se al è de gradazion dal zâl o dal ros o dai colôrs neutris, nol à avonde fuarce, nol è avonde vîf:  fra lis sfesis da la persiane e jentrave une lûs smavide frede (Franca Mainardis, Aiar di cjase)

Polirematichis e espressions idiomatichis

• a sanc frêt loc.adi.inv., loc.av.
• cafè frêt loc.s.m.
• fâ crodi che il Signôr al sei muart di frêt loc.v.
• fâ frêt loc.v.
• fâ il cjalt e il frêt loc.v.
• murî di frêt loc.v.
• sanc frêt loc.s.m.
• sudâ frêt loc.v.
• vê frêt loc.v.
• vignî i sudôrs frêts loc.v.

Proverbis:

• a Nadâl frêt mortâl
• a Sant Benedet la cisile e passe sot il tet, passe no passe, il frêt nus lasse
• a Sant Blâs il frêt al taie il nâs
• a Sant Nicolò il frêt al dîs: o soi ca cumò
• a Sante Catarine il frêt al 'simine
• a Sante Catarine il frêt al va in cusine
• ce che al pare il frêt al pare ancje il cjalt
• che al sedi cjalt che al sedi frêt, cui che al à di bevi al à simpri sêt
• cuant che al cjante il ciuçau, il frêt al va a cjadaldiaul
• cuant che la nêf e je su la mont Pinêt, par dut il mont al è frêt
• cui che al è scotât ta la aghe cjalde al à pôre di chê frede
• cui che nol à frêt no si scjalde
• Diu al mande il frêt daûr dal tabâr
• Epifanie, il frêt si invie
• fin a Nadâl il frêt nol fâs mâl, di nadâl inlà il frêt si 'nd va
• il jet cjalt al fâs la mignestre frede
• il puar al mûr passût, il siôr di fam, il predi di frêt
• il Signôr al mande il frêt daûr de vieste
• man frede, cûr cjalt
• nêf in mont, frêt al plan
• ni il cjalt ni il frêt il lôf no ju à mangjâts
• ni il cjalt ni il frêt nissun no ju à mangjâts
• ni il frêt ni il cjalt nissun no ju à mangjâts
• Pasche tafanie il frêt al va in smanie
• prin di Nadâl il frêt nol è rivât, daspò Nadâl il frêt al è passât
• Sant Antoni, il frêt al va di coni
• Sant Antoni, il frêt al va in demoni
• Sant Blâs il frêt al fâs la pâs
• Sante Catarine e mene il frêt cu la caretine
• Sante Luzie il frêt al cuzie
• Sante Luzie il frêt si invie
• si nas cjalts e si mûr frêts
• tal frêt e sta ben dome la glace