Dizionari de Lenghe Furlane

pelôs  pe|lôs  [AF]

1. adi. che al à pêi, che al è cuviert di pêi, ancje plui dal normâl:  la camarele, une fantate cence etât, cui dincj luncs e lis gjambis pelosis, si sentà dongje Eliseo (Carlo Sgorlon, Prime di sere); [il frut] al scomençave a cragnâ subit di tornâ vie parcè che no lu lassavin nancje tocjâ chê pipine sul sofà o chel gjat pelôs sul armâr (Dino Virgili, La aghe da pît la cleve)
   
   1. (fig.) cuviert di plui elements fis, tant che i pêi:  la rive gjestre e je pelose di selets e di gjatui; di chê altre bande une boschete di pôi (Catarine Percude, Lis aganis di Borgnan)
2. adi. (fig.) che al va cuintri de umanitât, de pietât, de religjon:  chel mulinâr al veve il cûr pelôs (Josef Cjargnel, La farine dal diaul); chei tâi / che no àn dûl in nuie afat? dal copâ / a ti àn la anime pelose (Zuan Minut, I barbars)
   
   1. di alc che al varès di jessi fat par bontât, che invezit al à par fin un tornecont:  nol è nancje dignitôs metisi sù i vistîts di un "pacifisim" pelôs, sglonfât ancje chel di une retoriche masse dolçose e fraide (Angelo Floramo, 1914-2014 Il centenari des bausiis e de vergogne); caritât pelose
      Sin. bausâr , fals , ipocrit
   2. di alc, che al è dûr di acetâ, che al è negatîf o dificil:  la realtât pelose de Furlanie, vecje di secui, e jere tornade dongje cence visâsi (Pieri Menis, Chei di Muraie); al rivà simpri a tirâse fûr cun fortune di situazions une vore pelosis (Gianni Colledani, Un furlan a Wuhan)
      Sin. brut , ledrôs , osteât , osteôs
   3. di argoment, dificil di tratâ o di risolvi:  in cheste tierce part o frontìn un argoment "laterâl" ma pelôs: il rapuart fra Friûl e Triest te otiche de evoluzion storiche de cuistion furlane (Sergio Cecotti, La tierce cuistion furlane)
      Sin. delicât , critic , rognôs , ledrôs , ingredeât , gredeât

Polirematichis e espressions idiomatichis

• caritât pelose loc.s.f.
• cûr pelôs loc.s.m.
• viodile pelose loc.v.

Proverbis:

• femine pelose o mate o virtuose
• lune pelose zornade ploiose