Dizionari de Lenghe Furlane

patît  pa|tît  [AF]

1. p.pass., adi. viôt patî :  i resisteve dentri la voie di scancelâ lis umiliazions patidis cul fâ viodi ce che e saveve e dulà che e podeve rivâ (Maria Forte, Cjase di Dalban)
2. adi. di cdn., magri, pôc in fuarcis e pôc in salût:  une femine secje, patide, zale, fruçade de fadie e de miserie (Pieri Somede dai Marcs, Timp di infier); al scuadrave il nevôt par jessi dal dut sigûr che al stave ben, che nol jere patît, che la scuele no lu scanave (Franca Mainardis, Aiar di cjase); un om, cu la barbe lungje, une muse patide e i cjavei in disordin, al domande (Pieri Menis, Zilugne)
   Sin. scunît , deperît , sbatût
   Cfr. magri , micul , scarmulin , schinchinît , sclagn , sec , secandul , stransît , strissinît , smenglât , liul , sidiât , vidriç , sbasît
   
   1. di alc, soredut di alc di mangjâ o di part di plante, che nol è fresc, che i mancje pôc a tacâ a lâ di mâl:  te stanzie dongje, chê de vegle, un lumin inmò impiât e l'odôr di orâr des zoiis, di flôrs patîts e di cjandelis distudadis (Pieri Somede dai Marcs, La cjarande)
      Cfr. laît , lami , flap
3. adi., s.m. che, cui che al à une grande passion par alc o par cdn.:  Carleto al jere un patît dal zûc dal balon (Meni Ucel, La partide); ancje se no soi un patît dal furlan, o ritegni che la estinzion di une lenghe ancje se la clamin piçule, a je simpri une grande piardite culturâl (Luche Nazzi, La storie vere de "Garibaldi-Natisone")
   Sin. amiradôr , apassionât , fissât