Dizionari de Lenghe Furlane

purcit  /-ìt/  pur|cit  [FO, TS]

1. s.m. zool.com. mamifar dumiesti derivât dal cenglâr, lat. sient. Sus scrofa domesticus, arlevât soredut pe cjar:  tai cjôts i purcits di grasse a metevin dongje dì par dì, pe fieste di cuant che si purcite (Dino Virgili, La aghe da pît la cleve); e nudrive une cuantitât di besteam, e a carnevâl i siei purcits e jerin i plui biei dal roiâl, e ju vendeve simpri cul floc a la orele (Catarine Percude, La mulinarie)
   Sin. purciel , temporâl³ , chit , cjacjà
   Cfr. scrove , troie , gnac , viru , pignole , gruc , purcitut , griot , suìn , rimâ¹ , rugnî , vuicâ , rugnâ , cenglâr
2. s.m. gastr. dome sing., cjar di chel animâl:  lis fuiacis, i ûfs colorâts, il magri di purcit, il salam, il pistum, la cjar e il vin dal past di Pasche (Dino Virgili, La aghe da pît la cleve)
3. s.m. (fig.) persone grasse e mangjone:  aial ancjemò fam chel purcit?
4. s.m. (fig.) persone sporcje:  laviti, purcit che tu sês
   Sin. cragnôs , ludro , soçat , sporcacjon
5. s.m. (fig., spres.) persone che no rispiete ciertis convenzions morâls, spec. te sessualitât:  «Fantat, fermiti». Ma Tilio [che al veve lassade incinte la sûr di chel che lu clamave] al passà dret, cul cjâf bas, cence rispuindi. «Fermiti, purcit!», e al fasè un pas par brincâlu (Pieri Menis, Il fi de Rosse); «…o soi stât cu la Nute…». […] «Sporcacjon, purcitat, carognate! E tu olsis a dîmal. Sâstu o no sâstu che ae tô etât jo nancje no mi impensavi di chês porcariis?» (Meni Ucel, Confessions); [al predi e ae femine cjatâts insiemi tal jet] ma vuaitis di sigûr / i sês da raza e da famea dai purcits (Giorgio Ferigo, Adelina)
   Sin. cragnôs , ludro , soçat , sporcacjon
6. adi. cun significât negatîf gjeneric, par dâ enfasi in imprecazions, o in ofesis gjenerichis:  "Sì, o ai capît, Saco, sango purcit, o ai capît!" (Stiefin Morat, Donald dal Tiliment); par dîti il vêr tu mi dâs poc impaç / e un purcit come te no stimi tant / e di un simil rivâl mi cjol solaç (Ermes di Colorêt, II, 35)
   Sin. cragnôs , putan , maledet , boie¹ , porc , porco
7. s.m. [CO, TS] zool.com. piçul crustaci dal gjenar Oniscus, viôt purcitut

Polirematichis e espressions idiomatichis

• fâ la vite dal purcit loc.v.
• sierâ la puarte dal cjôt daspò scjampât il purcit loc.v.

Proverbis:

• a vuelin dôs robis par fâ stâ ben une cjase: predi e purcit
• cuant che il purcit al è gras, e je ore di copâlu
• cui che al vûl stâ ben une dì, che al mangji ben; un mês, che si maridi; un an, che al maci il purcit; dute la vite, che al ledi predi
• doi neris a fasin stâ ben la famee: predi e purcit
• dôs robis a son buinis daspò muartis: avâr e purcit
• i purcits si ju stime a pês
• il miôr piruç i cole in bocje al purcit
• il purcit co al à bevût il lavum al strucje il podin
• il tegnôs al è come il purcit che al è bon dome daspò muart
• la barbe il ben di un dì, la femine il ben di un mês, il purcit il ben di un an
• lis trê contentecis dal om: lâ coscrit, copâ il purcit, murî la femine
• no covente cjalâ il laip, covente cjalâ il purcit
• no si traii il pan di forment al purcit
• nol vâl vendi il cjôt par comprâ il purcit
• par fâ il predi al covente: orele di marcjadant, bocje di purcit e schene di mus
• prin di lâ a cjoli il purcit, si à di fâ il cjôt
• purcit di mulinâr, cjan di becjâr, fantate di ostarie no convegnin ogni massarie
• purcit e marcjadant si pesiju daspò muarts
• Sant Andree, il purcit su la bree
• si daur il sorc ai purcits magris