Dizionari de Lenghe Furlane

rugnâ  ru|gnâ  [AF]

1. v.tr. fâ viers grâfs e grês, luncs o ripetûts, tipics di ciertis bestiis tant che il cjan, il purcit, l'ors e v.i.:  al sintive i cjans che a rugnavin … Ju sintive simpri plui dongje (Checo Tam, Domenie di cjace); il paron nol capive il motîf di chel puar purcitut, che invezit di cressi al calave e nol veve nancje flât di rugnâ (Angelo Covazzi, A gustâ dal plevan)
2. v.tr., v.intr. fevelâ o dî fra i dincj, cun vôs basse e sorde, ancje pôc creançose:  i furlans denant dai sportei, cuant che a cjatin dut un gredei, dut ingolfât, dut intrigât, dut complicât? Ce disino? Cemût si sfoghino? Ce blesteme e ce ofese tirino fûr? «Talians!», a rugnin pe buchete (Riedo Pup, I furlans e i talians)
   Sin. barbotâ , brondâ , brosegnâ , bruî , mugnâ , mugnulâ , mugulâ , mungugnâ , murmugnâ , murmuiâ , murungulâ , rusinâ , ruzâ , sbrundâ , sbruntulâ , smurmugnâ , smurmuiâ
   
   1. fevelâ o dî, ancje a fuart, cun ande agressive o di proteste o di pocje creance:  "Se no savês fevelâ, imparait" al rugne il fari cuntun estro di pofarbio (Luigi Gortani, Il mestri sore ducj i mestris); po il paron al rugne, si rabie (Costantino Smaniotto, Co l'amôr al cimie)
3. v.intr. (fig.) di elements naturâi, machinis e v.i., fâ sunsûr fuart, grâf e lunc:  in chê gnot dal diaul che l'aiar al rugnave e al sivilave (Dino Virgili, La aghe da pît la cleve); tal doman il timp nol rugnave plui ma l'asfalt al jere bagnât (Fabian Ros, La rambe); il Shell al faseve lâ sù di zîrs il motôr che lu imbalave, e trombetâ a dut clacson e zigâ chei altris daûr e rugnâ lis motos di fondilis (Dino Virgili, La strade come un destin)
   Sin. burlâ , butulâ , mugulâ , rontâ , ruzâ