gjal
gjal
[AF]
-
s.m.
mascli de gjaline, cressût e no spadât:
un gjal lontan al veve chichiricât a lunc come un bundì (Dino Virgili, La aghe da pît la cleve);
al cjante il gjal / al criche il dì / mandi ninine / tocje partî (Popolâr, Al cjante il gjal)
Cfr. gjaline
, poleç
, poleçut
, cjapon
-
s.m.
sparavint a forme di gjal:
"A i è nassude la jerbe sul cuviert [dal tor]." "Indulà?" "Vele là sù, sui cops." "Po sì lafè. E ce alte! A rive cuasi fin sot la code dal gjal" (Luigi Gortani, Il tor di Mueç)
Proverbis:
- a Nadâl un pît di gjal
- a Nadâl un pît di gjal, a pascute miezorute
- a Nadâl un pît di gjal, prin dal an un pît di cjan
- a Nadâl un pît di gjal, prin dal an un pît di cjan, a Sant Antoni un pît di demoni
- al cjante il gjal vie pe zornade, al è il diaul che al è par strade
- cuant che il gjal al cjante la matine, la ploie e je vicine; cuant che al cjante la sere, bontimp si spere
- cuant che il gjal piçul al cjante, il grant al à za cjantât
- cuant che il gjal zovin al cjante, il vieli al à za cjantât
- di Sant Tomâs a Nadâl al cres il dì un pas di gjal
- doi gjai intun gjalinâr no stan ben
- in chê cjase che la gjaline e cjante e il gjal al tâs e je pocje pâs
- la fantate no cjale il gjalinâr ma il gjal
- ogni dì al cjante il gjal e ogni dì al ven dì
- prin di dî une peraule, bisugne bati la ale tant che il gjal
- se il gjal al cjante daspò di misdì, il bontimp al è par finî
- une femine par cjase, un gjal par gjalinâr