sensibilitât
sen|si|bi|li|tât
[AF]
-
s.f.
facoltât di sintî cui orghins sensoriâi:
jo o ringrazii il Signôr, che dopo che o ai pierdude la lûs dai voi, mi à dade une grande sensibilitât, tant che mi pâr dut di viodi (Pieri Somede dai Marcs, Mame…)
-
facoltât di sintî, capî, intuî, previodi e v.i., no dome cui orghins sensoriâi:
dispès mi soi domandade dontri che i rivave a jê chest don di "sintî" il destin di chei altris. Salacor e fo la sô vite a spiçâi la sensibilitât. E leieve intal cûr des personis (Gianni Gregoricchio, Trê feminis)
-
s.f.
(fig.)
disposizion o capacitât di sintî lis emozions cun intensitât:
"Viodêt mo, Pascute: jo, fin di frut, o ai simpri fat une vite ritirade, rimite; cjase e farie e a messe la domenie, ma no par chest che o sedi un salvadi, un om cence sensibilitât […]" (Roberto Ongaro, Cretevierte);
"Une frutate, che e à di pandi in dut e pardut di jessi femine, ven a stâi une creature di sensibilitât e di finece!" (Pieri Piçul, Vieri e gnûf)
-
maniere particolâr di percepî, di intindi, di reagjî:
a son considerazions, riflessions, critichis o propuestis che a rivuardin e che a impegnin la personalitât dai gjornaliscj, la lôr sensibilitât, la lôr tindince o plee politiche, religjose, culturâl (Riedo Pup, Il partît dai zovins coscrits)
-
atenzion particolâr par alc o par cdn.:
chel messedot dialetâl che al trionfe a Udin e che al fâs juste riviel a cui che al à cualchi sensibilitât sul cont dal fevelâ (Josef Marchet, Dome un rimiedi par salvâ il furlan: insegnâlu tes scuelis);
[il pape] al à mostrade sensibilitât par dutis lis cuistions che a àn a ce fâ cui ultins, cu lis minorancis, cu lis comunitâts cristianis bandonadis e no scoltadis (Luciano Lister, Cuant che Glesie e popul no fevelin la stesse lenghe)
Sin. passion
, interès
, atenzion
-
s.f.
atenzion pai sintiments e pes sensazions di chei altris:
[l'ispetôr] al jere stât slontanât dal câs cun tante pocje creance e sensibilitât (Roberto Ongaro, Cretevierte)
Sin. atenzion
, rivuart1
, prudence
, rispiet
-
s.f.
[TS]
biol.
carateristiche di un organisim di sintî l'efiet di un agjent, soredut di un patogjen o di une sostance chimiche o sim.:
resistence a la peronospore e al oidi buine. Sensibilitât a la mufe grise (botrite) no tant alte (Enrico Peterlunger, Lis varietâts di vît resistentis a lis malatiis)
-
s.f.
[TS]
tecn.
capacitât di un imprest di segnalâ des variazions o di reagjî a cierts segnâi
-
s.f.
[TS]
fotogr.
capacitât di une pelicule o di une lastre di sei impressionade de lûs