Dizionari de Lenghe Furlane

strade  stra|de  [FO]

1. s.f. striche di teren splanât, batût, lastrât o asfaltât, là che a puedin passâ veicui o personis, e che e unìs plui localitâts:  a vevin taiât la culine par fâ sù un puint, e sot e passave la strade gnove, che e lassave fûr il paîs (Carlo Sgorlon, Prime di sere); de Cjuie la strade e va jù a plomp cuintri Colorêt e cuasi no si viodile tal mieç dai cocolârs e des agaciis e jenfri lis muraiis altis dai roncs (Riedo Pup, Il Crist di Quilin)
   Cfr. androne , vie , scjavace , troi , stroncje , scurte , semide , stradele , stradon , viâl
   
   1. vie o viâl di une citât, di une vile e v.i.:  a lerin a spas pes stradis dal paîs, ancjemò clipis, framieç lis cjasis e lis stalis (Agnul di Spere, Vivi a Codroip)
      Sin. vie
2. s.f. percors che si à di fâ par rivâ di cualchi bande:  i savevi la strade, me visavi e i savevi dulà voltâ i cjantons (Stiefin Morat, Kebar krossè); sul cjanton de glesie o domandìn la strade plui curte par lâ in place (Arturo Feruglio, Viaç a Vignesie)
   
   1. timp che si sta a rivâ di cualchi bande:  so pari si ferme, al à la muse dure. «Monte» i ordene, e par strade nancje une peraule (Alan Brusini, Par stradis lungjis)
3. s.f. (fig.) maniere di sucedi, di lâ indevant:  il mont no si sarès voltât di un et. Dut pe sô strade come prime (Alan Brusini, Par stradis lungjis)
   Sin. bande , viers , maniere , mût , ande
   
   1. maniere di vivi, sielte che si fâs te vite, tai afârs, te profession e v.i.:  si jerin maridâts ducj i doi: cualchi alc - ma ce mo? - al jere stât çoncjât. Nissun saveve dî ce. Ognidun al veve sielte la sô strade (Dino Virgili, Ombrenis sul liston); [gno pari] al varès bramât che ancje i miei fradis a cjapassin la strade de scuele, ma lôr finidis lis medis, no 'nd vevin volût savênt (Gianni Gregoricchio, Trê feminis)
      Sin. vie
4. s.f. (fig.) schirie di azions, imprescj e v.i. doprâts par rivâ a un fin, maniere di procedi intal fâ alc:  lis stradis a son dôs: o la ribelion o la concuiste pacifiche (Josef Marchet, E se no nus dassin la autonomie)
   Sin. maniere , mût , vie , forme , mieç , sisteme
   Cfr. pussibilitât , alternative , opzion
5. s.f. [TS] marang. prin tai li che dopo si pues lâ indevant a seâ:  il lavôr al jere sfadiôs, come che al veve pensât: bisugnave jessi in doi, e vê un seon cu la strade ben vierte (Carlo Sgorlon, Prime di sere)

Polirematichis e espressions idiomatichis

• a metât strade loc.av., loc.adi.inv.
• a mieze strade loc.av., loc.adi.inv.
• brute strade loc.s.f.
• dâ strade loc.v.
• dâ strade libare loc.v.
• di chê strade loc.av.
• di strade loc.av.
• fâ strade loc.v.
• fâsi strade loc.v.
• lâ fûr di strade loc.v.
• lâ pe sô strade loc.v.
• meti par strade loc.v.
• metisi in strade loc.v.
• metisi par strade loc.v.
• misurâ la strade loc.v.
• sassin di strade loc.s.m.
• segnâ la strade loc.v.
• suntune strade loc.av.
• taiâ la strade loc.v.
• vierzi la strade loc.v.
• voltâ strade loc.v.

Proverbis:

• al cjante il gjal vie pe zornade, al è il diaul che al è par strade
• baste che si rivi, ogni strade e je buine
• cui che al lasse la strade viere pe gnove al sa ce che al lasse ma nol sa ce che al cjate
• cui che al va dret nol fale la strade
• dutis lis stradis a menin a Rome
• fâ justizie al è scomençâ une buine strade
• i pintûts e i scuintiâts a van ducj par une strade
• il pintût e il scuintiât a van pe stesse strade
• la strade drete e je la plui curte
• la strade plui curte a je chê che si cjape daurman
• mai bandonâ la strade viere par chê gnove
• ni messe ni blave no slungjin la strade
• no bisugne lassâ la strade viere par chê gnove
• par chê strade che no si vûl lâ al tocje di cori
• ploie in strade, tampieste in buteghe
• se no lis àn, a son par strade