Dizionari de Lenghe Furlane

troi  /-ò-/  troi  [FO]

1. s.m. percors segnât dome dal passaç, no lastrât o asfaltât, avonde stret di permeti di lâ a pît, in campagne, tal bosc o in mont:  o vin cjapât la strade de Selve e dopo pai trois, sù pal cjamp Boâr, fin là sù dal Cjasâl (Pieri Menis, Il cuader de none); une dì mi jeri pierdût tai trois dai boscuts di agaciis che a cressin dongje des rivis de Tor (Checo Tam, Sense)
   Sin. semide
   Cfr. strade , stradele , stroncje , scurte
   
   1. piçul passaç li che si cjamine ancje dentri di une proprietât:  ristielâ lis fueis coladis, tignî nets i trois dal zardin, scovâ lis pedradis (Alan Brusini, Amîs come prime); siore Lise si judave plui di dut cu lis jerbis buinis. E lave a sielzi fuee par fuee, tun zîr pai trois dal ort, e e meteve dongje il so macet misturât (Maria Forte, Cjase di Dalban)
      Cfr. stradoncin
2. s.m. (fig.) maniere o percors di lâ indevant, trafile di vicendis:  al leve cu la memorie pai trois des sôs storiis curiosis (Alan Brusini, Come tai romançs); cussì mo cualchidun al à vût il pinsîr di rincurâ e di meti insiemi almancul un braç di dutis chestis predicjis […]. Par chest troi al è rivât chest librut (Josef Marchet, Lis predicjis dal muini); so pari nol veve argoments in contrari e al veve dite che e lave ben, che al veve il dirit di sielzisi un troi (Agnul di Spere, I prâts des Savodagnis)
   Sin. vie , strade
   
   1. maniere o linie di riferiment par rivâ a un obietîf:  dome Onde Furlane fin dai timps de grafie normalizade des Provinciis e je lade dilunc dal troi de politiche linguistiche (Adrian Cescje, Memoriis di politiche linguistiche)
      Sin. linie , direzion , bande , strade

Polirematichis e espressions idiomatichis

• lâ fûr dal troi loc.v.
• lâ pai trois loc.v.
• mandâ pai trois loc.v.
• parâ pai trois loc.v.
• segnâ il troi loc.v.
• tabac di troi loc.s.m.
• vierzi il troi loc.v.
• vignî pai trois loc.v.

Proverbis:

• il liberâl e il semenadôr a van par un troi
• tal troi simpri batût no ven sù jerbe