Dizionari de Lenghe Furlane

pratiche  /-à-/  pra|ti|che  [FO]

1. s.f. aplicazion concrete:  i furlans a àn une religjon che, forsit, e sarès plasude une vore a nestri Signôr: pocje o nuie teologjie e grande pratiche (Riedo Pup, I furlans e la religjon); no volìn che une altre desene di agns e passi e che dut al resti […] sul plan dai proclamis e des enunziazions e pôc o nuie al mudi te pratiche (Silvana Fachin Schiavi, I dîs agns de leç n. 482/99)
   
   1. realtât des robis, concretece de vite:  Par nô nol varès vût di cambiâ nuie, in teorie, che ognidun al restave tal so puest. Ma la pratiche e je diferente e la esperience no nus permeteve di fâsi ilusions (Antoni Beline, Pre Pitin)
2. s.f. ativitât concrete:  alfabetizazion di fruts che a àn ancjemò di inviâ la pratiche de scriture (Adrian Cescje, Memoriis di politiche linguistiche)
   
   1. il meti in vore une cualitât:  la pratiche dai vizis e des virtûts
3. s.f. at o complès di ats, determinâts di un ûs, di une liturgjie o di une esigjence:  in Friûl e à di vê durât un biel pieç la religjon celtiche e cualchi vanzum di chês crodincis e pratichis al restà ancje dopo che il popul le veve bandonade (Josef Marchet, Cuintristorie dal Friûl fin sot la Italie); no mancjin testemoneancis di ciertis sôs pratichis alchemichis e terapeutichis (ladis strucjis) (Mario Turello, Il brevet)
   Sin. at , fat¹ , azion¹
4. s.f. procedure, maniere di puartâ indevant une ativitât:  lis rêts a domandin impegn aministratîf e di organizazion, ma a son une vore utilis par favorî la circolazion di pratichis, i scambis, i confronts, la inovazion didatiche (Patrizia Pavatti, La tutele de lenghe furlane a scuele)
5. s.f. spec. tal pl., procedure burocratiche che e prodûs une documentazion:  une dì o cjapi une letare dal prefet che al mi dîs di tornâ a studiâ la pratiche [par fâ sù lis scuelis gnovis] e intant di spietâ prin di lâ indenant (Pieri Somede dai Marcs, Lis scuelis e la nêf); o vevi fatis lis pratichis pal trasferiment e o jeri svolade a Vignesie (Gianni Gregoricchio, Trê feminis)
   Sin. cartolament
   
   1. at, documentazion, fassicul di une procedure:  lis provinciis - se e restaran in pîts in cualchi forme - si ridusaran al ufici di trasmeti pratichis ai orghins centrâi (Josef Marchet, In cercje di democrazie)
6. s.f. il fat di esercitâsi:  a jerin trupis che a vevin stât al front e che a spietavin di tornâ e i uficiâi, savintlu, ju tignivin simpri in pratiche (Roberto Ongaro, Il muc)
   Sin. adestrament , alenament , esercizi
7. s.f. cognossince o capacitât che e ven de esperience:  come che a san ducj chei che a àn un tic di pratiche di gjornâi, il diretôr al è une figure centrâl e par fuarce di robis centraliste (Max Mauro, Un Friûl difarent: i 90 mhz di Onde Furlane); o ai pocje pratiche di ordenadôrs ancjemò e no cognòs tancj programs di base di dâts, ma o pues imagjinâ lis lôr potenzialitâts (Adrian Cescje, Memoriis di politiche linguistiche); nol covente dî che la pratiche de cjosse publiche, no si le cjape ni in trê mês ni in trê agn (Josef Marchet, Fûr cui che i tocje); cops o modons che Min al cjape par ordin a doi a doi e ju incasone cun pratiche tes stelazis a suiâsi in soreli (Ivano Urli, Storie di Min)
   Sin. bitince , cognossince , esperience , man , cognizion
8. s.f. dade di timp che si impare un mistîr:  [Cesare Miani] a Udin al faseve pratiche alì dal studi di Provino Valle (Bepi Agostinis, Storie de art in Friûl)
   Sin. garzonât

Polirematichis e espressions idiomatichis

• fâ pratiche loc.v.
• meti in pratiche loc.v.
• vê a pratiche loc.v.
• vê pratiche loc.v.

Proverbis:

• e vâl plui la pratiche che no la gramatiche