Dizionari de Lenghe Furlane

colôr  co|lôr  [FO]

1. s.m. carateristiche che si viôt tun ogjet par vie de lûs che al mande indaûr, che e pues vê diviersis tonalitâts:  l'arbul di Nadâl al sflamiave di mil colôrs (Pieri Menis, Nadâl ancje par Gjelmin); altris malâts neurologjics a puedin pierdi in maniere seletive la capacitât di ricognossi ogjets o animâi (agnosie visive), o pûr lis musis (prosopoagnosie); altris no rivin plui a viodi i colôrs (acromatopsie), o a sintî i sunôrs (amusie) (Franc Fari, La evoluzion dal çurviel e de cussience tai vertebrâts)
   Sin. tinte
   Var. calôr²
   Cfr. blanc , neri , grîs , ros , zâl , blu , celest , vert , maron , naranç , blâf , narancin , narançon , viole¹ , violet , rose , fucsie , lat e vin , lile , carnisin , ravost , scarlat , scarlatin , rossit , rosson , flame¹ , fûc , infogât , modon , coce , freule , cjariesie , sope di vin , ruan , puinte , ciespe , veri , vueli¹ , zalit , limon , canarin , formentin , lanchin , perlin , latisin , turchin , celestin , celeston , verdulin , verdat , verdon , sborf¹ , verze , pais , tiere , fuee muarte , canele² , canelin , nosele , cjastine , tabac , tonie di frari , cafè , cafelat , pantiane , pantianin , semule , blancjiç , bîs , cinise , cinisin , cenarin , fum , fumul , frusin , cjalin , nerat , moro , castagn , biont , sâl e pevar , sgrisul² , scrit , sverzelât , marmorin , miscliç , sporc , vîf , vivarôs , scjassôs , lustri¹ , smarît , smavît , smamît , smuart , canzant , at , sfumadure , tonalitât
   
   1. [CO, TS] fis. cualitât percetive dai cuarps materiâi che e dipent de frecuence des radiazions eletromagnetichis che e mande la lôr struture atomiche, o pe energjie che e à o parcè che e rimande la lûs che i bat sore
   2. une vore dispès al forme locuzions sostantivâls o adietivâls dongje di un non, bessôl o introdusût de preposizion "di" o di un adietîf che al specifiche la tonalitât, sedi daûr di associazions che a son tradizionâls, sedi daûr de fantasie o espressivitât di cui che al fevele:  il soreli, colôr polvar di modon, ma lustri, al impiave lis fueis laidis di Novembar su culinis inmò verdis (Alan Brusini, Come tai romançs); la code colôr rusin di une bolp (Carlo Sgorlon, Ombris tal infinît); alt e ben tressât, bocje sutile, nâs dret e doi voi colôr di une lame di curtis (Roberto Ongaro, Il muc); Anzuline, intun cjanton de stanzie, che ju scoltave incjantade e ju cjalave cui siei voglons colôr cjastine (Maria Forte, Cjase di Dalban); musis frescjis colôr dai miluçs e dai pierçui (Arturo Feruglio, Viaç a Vignesie); [i miluçs] a jerin crûts, colôr de fiere, cul pêl lunc parsore; par madressi ur coventavin ancjemò doi mês (Josef Marchet, Lis predicjis dal muini); colôr sope di ledan (Josef Marchet, Lis predicjis dal muini); colôr panze di muinie sfracaiade
   3. cun diviersis specificazions al pues riferîsi a situazions psicologjichis, esistenziâls, emozions e v.i. par dî positivitât, negativitât, vivece, malinconie e v.i.:  a jerin stâts i siums che te sô vite si jerin mudâts dal lusôr de fantasie al colôr plombin de realtât (Roberto Ongaro, Il muc); nol viôt simpri dut colôr di rose, ma nancje dut neri (Elio Varutti, Il suicidi dai furlans)
2. s.m. sostance doprade par colorâ:  Zuanfrancesc al tornave sù su la armadure, al cjapave in man il pinel, lu tocjave tal colôr (Dino Virgili, La aghe da pît la cleve); sui mûrs, cuntun stamp a vevin piturade la sesule e il martiel cul colôr ros (Alan Brusini, Par stradis lungjis); Costantin i veve regalade une scjatule grande di colôrs a vueli (Carlo Sgorlon, Ombris tal infinît)
   Sin. colorant , vernîs , piture
3. s.m. colôr de piel umane, massime de muse:  cuant che e tornà e veve un biel colôr calm su la muse (Maria Forte, La fie çuete); «Sù, bevêt… vuê e je fieste grande…» e cussì bocâi e bocâi di vin a metevin colôr su lis musis dai invidâts (Pieri Menis, Chei di Muraie); dome siôr Silvio, che i amîs a clamavin "Smanie", al pretindè di dîi la sô e intant un colôr sanghin i cjariave il cerneli (Maria Forte, Cjase di Dalban)
   Sin. carnision , ciere , incolorît
   
   1. colôr de piel percepît tant che carateristiche raziâl:  o sarìn stâts un cinc, sîs mil in chê dì: blancs, neris, ros, zâi, e il colôr nol faseve nissune diference (Josef Marchet, Lis predicjis dal muini)
4. s.m. orientament politic:  a son tancj e di ducj i colôrs politics chei che a àn doprât il cuarp di Eluana come «cjamp di bataie» par finalitâts che no jerin i interès di Eluana (Christian Romanin, Amato De Monte: Il Friûl, patrie des bataiis di civiltât); vebit pazience, idealiscj di ogni colôr, se o fevelìn cussì ordenari (Josef Marchet, Iresponsabilitât)
   Sin. idee , opinion , partît³
5. s.m. mût vivarôs e carateristic di contâ, di comunicâ e v.i.:  il lôr mût di fevelâ al jere plen di colôr e dispès ancje di ligrie (Carlo Sgorlon, Ombris tal infinît); e je vere che, di un cent agn incà, i dialets talians a van pierdint il lôr colôr (Josef Marchet, Lenghe e lenghis in Italie)
   Sin. vivôr
6. s.m. aspiet, carateristiche che e fâs particolâr un puest, un ambient, un ogjet, une conte e v.i.:  [tra i prodots artesanâi in mostre] a 'ndi è un grum che e à il colôr e il savôr de nestre tiere e dal nestri costum, il stamp de nestre anime furlane (Josef Marchet, Di ca e di là de stangje)
   Sin. clime , atmosfere , savôr
7. s.m. [TS] zûcs in cierts zûcs, ognidun dai cuatri pâi
   
   1. tal poker, composizion di cjartis dal stes pâl
8. s.m. [TS] cinem., fotogr. tecniche che e riprodûs i colôrs de realtât:  la Italie e je stade un dai ultins paîs a fâ emissions televisivis a colôrs, tacant tal 1976

Polirematichis e espressions idiomatichis

• a colôrs loc.adi.inv., loc.av.
• di colôr loc.adi.inv.
• di colôrs loc.adi.inv.
• di ducj i colôrs loc.adi.inv., loc.pron.inv.
• di mil colôrs loc.adi.inv.
• di ogni colôr loc.adi.inv., loc.pron.inv.
• fâ colôr loc.v.
• lâ jù di colôr loc.v.
• mudâ colôr loc.v.
• smarîsi di colôr loc.v.
• smarît di colôr loc.adi.
• viodi dut colôr di rose loc.v.

Proverbis:

• il vin si lu cognòs tal savôr e il pan tal colôr
• l'amôr ind fâs fâ di ogni colôr